Last Updated:
உலக உணவுத் திட்டம் (WFP) எச்சரித்துள்ளபடி, 2027-ஆம் ஆண்டின் இறுதிக்குள் சுமார் 4.9 கோடி மக்கள் கடுமையான உணவுப் பற்றாக்குறைக்குத் தள்ளப்படுவார்கள்.
பசிபிக் பெருங்கடலில் ஏற்பட்டுள்ள தீவிர வெப்பமயமாதல் காரணமாக ‘எல் நினோ’ (El Nino) வானிலை மாற்றம் ‘சூப்பர் எல் நினோ’ (Super El Nino) எனும் உச்சக்கட்ட நிலையை எட்டியுள்ளதாக அமெரிக்காவின் கடல் மற்றும் வளிமண்டல நிர்வாகம் (NOAA) அறிவித்துள்ளது.
பசிபிக் பெருங்கடலின் மத்திய மற்றும் கிழக்குப் பகுதிகளில் கடல் நீர் இயல்பான அளவை விட அதிகமாக வெப்பமடைவதே ‘எல் நினோ’ எனப்படுகிறது. 2026 செப்டம்பர் 14 அன்று வெளியான தரவுகளின்படி, வெப்பநிலை உயர்வு 2 டிகிரி செல்சியஸைக் (3.6°F) கடந்துள்ளதால் இது “சூப்பர் எல் நினோ” ஆக மாறியுள்ளது. 2026 ஜூன் மாதம் தொடங்கின இந்த எல் நினோ, 2027-ஆம் ஆண்டின் தொடக்கத்தில் உச்சத்தை எட்டும் என்றும், 2027 மே மாதம் வரை நீடிக்கும் என்றும் எதிர்பார்க்கப்படுகிறது.
எல் நினோ தாக்கத்தால் கிழக்கு ஆப்பிரிக்கா, தென் அமெரிக்கா மற்றும் அமெரிக்காவின் தெற்குப் பகுதிகளில் அதிக மழைப்பொழிவு இருக்கும்.
அக்டோபர் முதல் டிசம்பர் வரை எத்தியோப்பியா, சோமாலியா மற்றும் கென்யாவில் 90% கூடுதல் மழைக்கு வாய்ப்புள்ளது. இது அப்பகுதியின் 70% வருடாந்திர மழையை அளிக்கும் என்றாலும், கடும் வெள்ள அபாயத்தையும் ஏற்படுத்துகிறது. எக்வடார், பெரு, பிரேசில், அர்ஜென்டினா மற்றும் அமெரிக்காவின் தெற்குப் பகுதிகளில் அதிக மழை மற்றும் வெள்ளப்பெருக்கு ஏற்பட வாய்ப்புள்ளது.
தெற்கு ஆசியா, தென்கிழக்கு ஆசியா, ஆஸ்திரேலியா மற்றும் தெற்கு ஆப்பிரிக்காவில் வறண்ட வானிலை நிலவும். இந்தியா மற்றும் பாகிஸ்தானில் கோடைகாலப் பருவமழை பொய்த்துள்ளது. இந்தியாவில் ஜூன் முதல் செப்டம்பர் தொடக்கம் வரை மழைப்பொழிவு 15% குறைந்துள்ளது.
இந்தோனேஷியாவின் சுமாத்ரா மற்றும் காலிமந்தன் பகுதிகளில் காட்டுத்தீ அபாயம் அதிகரித்துள்ளது. ஆஸ்திரேலியா மற்றும் தென்னாப்பிரிக்காவிலும் மழை குறைந்து வெப்பம் அதிகரிக்கும்.
உலக உணவுத் திட்டம் (WFP) எச்சரித்துள்ளபடி, 2027-ஆம் ஆண்டின் இறுதிக்குள் சுமார் 4.9 கோடி மக்கள் கடுமையான உணவுப் பற்றாக்குறைக்குத் தள்ளப்படுவர். இதனால் பட்டினியால் பாதிக்கப்படுபவர்களின் எண்ணிக்கை 27.4 கோடியாக உயரும். மேலும், சோளம், அரிசி போன்ற பயிர்கள் பெரும் பாதிப்பைச் சந்திக்கும்.
எல் நினோ காரணமாக உலகளாவிய வெப்பநிலை கணிசமாக அதிகரிக்கும். 2024-ஆம் ஆண்டை விட 2027-ஆம் ஆண்டு வரலாற்றிலேயே மிக வெப்பமான ஆண்டாகப் பதிவாக 86% வாய்ப்புள்ளதாக உலக வானிலை அமைப்பு (WMO) தெரிவித்துள்ளது. வட அமெரிக்காவில் இது பனிப்பொழிவைக் குறைக்கும் என்றும், அட்லாண்டிக் சூறாவளிகளின் தீவிரத்தைக் கட்டுப்படுத்தும் என்றும் கணிப்புகள் கூறுகின்றன.
