ஈரான் டிவி சேனல் மீது இஸ்ரேல் தாக்குதல்.. உயிர் தப்பிய பெண் செய்தி வாசிப்பாளர் – நேரலையில் சிக்கிய காட்சிகள்

இரு நாடுகளிடையே 4 ஆவது நாளாக மோதல் நீடித்த நிலையில், இஸ்ரேல் மீது ஈரான் நடத்திய தாக்குதலில் உயிரிழந்தோர் எண்ணிக்கை 17 ஆக அதிகரித்துள்ளது.

ஈரான் நடத்திய தாக்குதலில் இஸ்ரேலின் டெல் அவிவ் நகரில் உள்ள அமெரிக்கத் தூதரகம் லேசாகச் சேதமடைந்தது. இதையடுத்து தூதரகம் தற்காலிகமாக மூடப்பட்டது.

மற்றொரு புறம், ஈரான் தலைநகர் டெஹ்ரான் மீது இஸ்ரேல் குண்டு வீசியதால் பல இடங்கள் கடும் புகை மண்டலமாகக் காட்சியளித்தன.

இதேபோன்று ஈரானின் குவாம் நகர் அருகே உள்ள போர்டோவ் அணு உலை மீது இஸ்ரேல் குண்டு வீசியதில் லேசான நில அதிர்வு உணரப்பட்டதால் மக்கள் அலறியடித்து ஓடினர்.

மேலும், ஈரான் ராணுவத்தின் குவாட் படைப்பிரிவின் கட்டுப்பாட்டு மையத்தைத் தாக்கி அழித்துவிட்டதாக இஸ்ரேல் ராணுவம் அறிவித்துள்ளது.

ஈரான் – இஸ்ரேல் இடையேயான மோதல் தீவிரமடைந்து வரும் நிலையில், ஈரான் தலைநகர் டெஹ்ரானில் வசிக்கும் இந்தியர்கள் இன்று மாலைக்குள் வெளியேறும்படி இந்தியத் தூதரகம் அறிவுறுத்தியுள்ளது. இதனிடையே, ஈரானில் உள்ள மருத்துவக் கல்லூரியில் பயின்று வரும் இந்திய மாணவர்கள் தங்களைப் பாதுகாப்பாகத் தாயகம் அழைத்து வர நடவடிக்கை எடுக்க வேண்டும் என்று கோரிக்கை விடுத்துள்ளனர்.

இந்த மோதல் ஒருபக்கம் நடந்து கொண்டிருக்கும் நிலையில் செய்தி நேரலையின்போது இஸ்ரேல் ஈரான் மீது தாக்குதல் நடத்தியது. அப்போது பெண் செய்தி வாசிப்பாளர் பதறியடித்து ஓடிய காட்சிகள் தற்போது வைரலாகியுள்ளன.

இஸ்ரேல் தாக்குதலில் தொலைக்காட்சி நிறுவனத்தின் கட்டிடம் அதிர்ந்ததை வீடியோ காட்சியில் காண முடிகிறது.