இமயமலைப் பகுதியில் ஹெலிகொப்டர் விபத்து: ஆறு பேர் உயிரிழந்திருக்கலாம் என அச்சம்

இந்தியாவின் உத்தரகாண்ட் மாநிலத்தில் வெள்ளிக்கிழமை இடம்பெற்ற ஹெலிகொப்டர் விபத்தில் ஆறு பேர் உயிரிழந்திருக்கலாம் என அச்சம் வெளியிடப்பட்டுள்ளது.

இமயமலைப் பகுதியில் அமைந்துள்ள பிரபல இந்து புனித யாத்திரைத் தலமான பத்ரிநாத்திலிருந்து டேராடூன் நகரை நோக்கிப் பயணித்த ஹெலிகொப்டரே இவ்வாறு விபத்துக்குள்ளாகியுள்ளது.

குறித்த ஹெலிகொப்டரில் ஐந்து பயணிகளும் ஒரு விமானியும் இருந்ததாக இந்திய ஊடகங்கள் தெரிவித்துள்ளன.

சீரற்ற காலநிலை

சீரற்ற காலநிலையே விபத்துக்குக் காரணமாக இருக்கலாம் எனச் சந்தேகிக்கப்படுகிறது.

ஜோஷிமத் பகுதியில் உள்ள கிராமமொன்றுக்கு அருகில் ஹெலிகொப்டர் விபத்துக்குள்ளானதாகத் தமது அலுவலகத்துக்குத் தகவல் கிடைத்துள்ளதாக உத்தரகாண்ட் மாநில முதலமைச்சர் புஷ்கர் சிங் தாமி தெரிவித்துள்ளார்.

மாவட்ட நிர்வாகம், அனர்த்த முகாமைத்துவக் குழுக்கள் மற்றும் பாதுகாப்புப் படையினர் இணைந்து மீட்புப் பணிகளில் ஈடுபட்டுள்ளதாகவும் அவர் தனது எக்ஸ் சமூக வலைத்தளப் பதிவில் குறிப்பிட்டுள்ளார்.

இதனிடையே, விபத்து இடம்பெற்ற இடத்துக்கு மீட்புக் குழுவினர் விரைந்துள்ளதாகவும், சம்பவ இடத்தில் தீப்பிழம்புகளும் புகையும் தென்பட்டதாகவும் இந்தியத் தொலைக்காட்சி ஊடகங்கள் செய்தி வெளியிட்டுள்ளன.

விபத்தில் உயிரிழந்தவர்கள் தொடர்பான உத்தியோகபூர்வ உறுதிப்படுத்தல் மற்றும் மேலதிக விபரங்கள் வெளியாகவில்லை.