இந்திய கடல் பாதுகாப்புத் திறனில் மைல்கல்…! கடற்படையில் மேலும் மூன்று புதிய போர்க்கப்பல்கள் இணைப்பு…

இந்த மூன்று கப்பல்களும் ஐஎன்எஸ் சுரத், ஐஎன்எஸ் நீலகிரி மற்றும் ஐஎன்எஸ் வாக்ஷீர் ஆகியவை உள்நாட்டிலேயே கட்டமைக்கப்பட்டவை என்பதில் பெருமை கொள்வதாக பிரதமர் மோடி தனது உரையில் தெரிவித்தார். இந்த முன்னணி கடற்படை கப்பல்கள் அனைத்தும் ‘மேக் இன் இந்தியா’ திட்டத்தின் கீழ் உருவாக்கப்பட்டவை என்பது பெருமைக்குரிய விஷயம் எனவும், உலகின் முக்கிய கடல்சக்தியாக இந்தியா உருவெடுத்து வருவதாகவும் பிரதமர் மோடி தெரிவித்தார்.

இந்திய கடற்படை தலைமை தளபதி அட்மிரல் தினேஷ் கே திரிபாதி கூறுகையில், “ஐஎன்எஸ் சுரத் ப்ராஜெக்ட் 15ஏ மற்றும் 15பி திட்டங்களின் பெருமைமிக்க பாரம்பரியத்தை தொடர்கிறது. நீலகிரி என்பது ப்ராஜெக்ட் 17 ஏ பிரி கேட்டுகளின் முதல் கப்பல் மற்றும் வாக்ஷீர் என்பது ப்ராஜெக்ட் 75 இன் கடைசி நீர்மூழ்கிக் கப்பல் ஆகும். இந்த மூன்று தளங்கள் இந்திய கடற்படையின் திறன்களை மேலும் வலுப்படுத்தும் மற்றும் பயனுள்ளதாக மாற்றும். எங்கள் கடல் சார்ந்த நலன்களின் பாதுகாப்பை மேலும் வலுப்படுத்தும்” என தெரிவித்தார்.

மேலும், “கடற்படை தனது அதிக செயல்பாட்டு வேகத்தை பராமரித்து வருகிறது என்பதை உங்களுக்குத் தெரிவிப்பதில் எனக்கு மிகுந்த மகிழ்ச்சி அளிக்கிறது. இது இந்தியப் பெருங்கடல் பிராந்தியத்தில் எங்கள் தேசிய கடல் நலன்களைப் பூர்த்தி செய்வதற்கும், பிரதமரின் ‘சாகர், பாதுகாப்பு மற்றும் அனைவருக்கும் வளர்ச்சி’ என்ற பார்வையை செயல்படுத்துவதற்கும் எங்களுக்கு உதவியுள்ளது” எனவும் தெரிவித்தார்.

புதிய போர்க்கப்பல்கள் மற்றும் இந்திய கடற்படையின் பலம்

மும்பையில் மூன்று புதிய போர்க்கப்பல்கள் நாட்டுக்கு அர்ப்பணிக்கப்பட்டதை தொடர்ந்து, இந்திய கடற்படையின் திறன்கள் மற்றும் தற்போதுள்ள போர்க்கப்பல்களின் வகைகள் குறித்து விரிவாகக் காண்போம்.

புதிய வரவுகள்:

ஐஎன்எஸ் சுரத்: இது பி15பி வழிகாட்டப்பட்ட ஏவுகணை அழிப்புக் கப்பல் திட்டத்தின் நான்காவது மற்றும் இறுதிக் கப்பல். உலகின் மிகவும் மேம்பட்ட அழிப்புக் கப்பல்களில் ஒன்றாக இது கருதப்படுகிறது. பிரம்மோஸ் சூப்பர்சோனிக் ஏவுகணைகள் மற்றும் வான் பாதுகாப்பு ஏவுகணைகள் உட்பட பல்வேறு உள்நாட்டு ஆயுத அமைப்புகளைக் கொண்டது. 75% உள்நாட்டு உற்பத்திப் பொருட்களைக் கொண்டுள்ளது.

இதையும் படிக்க: ISRO: விண்ணில் வெற்றிகரமாக ஸ்பேட்எக்ஸ் செயற்கைக்கோள்களை இணைத்த இஸ்ரோ.. இந்தியாவிற்கு கிடைத்த பெருமை!

ஐஎன்எஸ் நீலகிரி: இது பி17ஏ ஸ்டெல்த் (Stealth) பிரி கேட் திட்டத்தின் முதல் கப்பல். அதிநவீன தொழில்நுட்பத்துடன் குறைந்த ரேடார் கவரேஜ் போன்ற அம்சங்களைக் கொண்டது. பிரம்மோஸ் ஏவுகணைகள் மற்றும் நீர்மூழ்கிக் கப்பல் எதிர்ப்பு போர் திறன்களையும் கொண்டுள்ளது.

ஐஎன்எஸ் வாக்ஷீர்: பிரான்சின் கடற்படை குழுமத்துடன் இணைந்து உருவாக்கப்பட்ட பி75 ஸ்கார்பீன் திட்டத்தின் கடைசி நீர்மூழ்கிக் கப்பல் இது. துல்லியமாக வழிகாட்டப்பட்ட ஆயுதங்கள் மற்றும் டார்பீடோக்களை ஏவும் திறன் கொண்டது.

இந்திய கடற்படையின் போர்க்கப்பல் வகைகள்:

விமானந்தாங்கி கப்பல்கள்: ஐஎன்எஸ் விக்ரமாதித்யா மற்றும் ஐஎன்எஸ் விக்ராந்த் ஆகியவை இந்திய கடற்படையின் முக்கிய விமானந்தாங்கி கப்பல்கள். இவை வான்வழித் தாக்குதல் திறனை வெளிப்படுத்துகின்றன.

அழிப்புக் கப்பல்கள் (Destroyers): இவை பல்வேறு தாக்குதல் மற்றும் தற்காப்பு நடவடிக்கைகளுக்காக வடிவமைக்கப்பட்டவை. கொல்கத்தா மற்றும் விசாகப்பட்டினம் வகை அழிப்புக் கப்பல்கள் குறிப்பிடத்தக்கவை.

இதையும் படிக்க: கயா – கோயம்புத்தூர் வாராந்திர சிறப்பு ரயில்… மறு அறிவிப்பு வரும் வரை இந்த ரயில் நிலையத்திலிருந்து புறப்படும்!

பிரி கேட்டுகள் (Frigates): இவை நடுத்தர அளவிலான போர்க்கப்பல்கள். ஷிவாலிக் வகை பிரி கேட்டுகள் மற்றும் கடலோர பாதுகாப்புக்காக வடிவமைக்கப்பட்ட கமோர்டா வகை கொர்வெட்டுகள் குறிப்பிடத்தக்கவை.

கொர்வெட்டுகள் (Corvettes): இவை சிறிய மற்றும் வேகமான போர்க்கப்பல்கள். கடலோர பாதுகாப்பு மற்றும் விரைவான தாக்குதல்களுக்காக வடிவமைக்கப்பட்டுள்ளன.

நீர்மூழ்கிக் கப்பல்கள் (Submarines): ஐஎன்எஸ் அரிஹந்த் போன்ற அணுசக்தி நீர்மூழ்கிக் கப்பல்கள் மற்றும் ஐஎன்எஸ் கல்வரி போன்ற வழக்கமான டீசல்-எலக்ட்ரிக் நீர்மூழ்கிக் கப்பல்கள் உள்ளன.

காவல் கப்பல்கள் (Patrol Vessels): இவை கடல் கண்காணிப்பு, மீட்பு மற்றும் கடலோர பாதுகாப்பு பணிகளுக்காக வடிவமைக்கப்பட்டுள்ளன.

கரையிறங்கும் கப்பல்கள் (Amphibious Warfare Ships): இவை படைகள் மற்றும் உபகரணங்களை கடற்கரையில் இறக்குவதற்கு முக்கியமானவை. ஐஎன்எஸ் ஜலாஷ்வா குறிப்பிடத்தக்கது.

இந்த புதிய கப்பல்களின் வருகை மற்றும் தற்போதுள்ள கடற்படையின் பலம் ஆகியவை இந்தியாவின் கடல்சார் திறன்களை மேலும் வலுப்படுத்துகின்றன. இது இந்தியாவை ஒரு முக்கிய கடல்சக்தியாக நிலைநிறுத்துகிறது.