புதுடெல்லி: இந்திய சந்தை ஏராளமான வணிகத்துக்கான வாய்ப்புகளை கொண்டிருப்பதாக உலக கோடீஸ்வரர்களில் ஒருவரும், பெர்க் ஷயர் ஹாத்வே நிறுவனத்தின் தலைவருமான வாரன் பஃபெட் தெரிவித்துள்ளார்.
பெர்க் ஷயர் நிறுவனத்தின் 2024-ம் ஆண்டு கூட்டம் அமெரிக்காவின் ஒமாஹாவில் நடைபெற்றது. அதில் கலந்து கொண்ட வாரன் பஃபெட்டிடம் இந்திய சந்தையில் வளர்ச்சிக்கான சாத்தியக்கூறுகள் குறித்து முதலீட்டாளர்கள் கேள்வியெழுப்பினர்.
அப்போது அவர் கூறியதாவது: அமெரிக்கா, சீனா, ஜெர்மனி, ஜப்பானுக்கு அடுத்தபடியாக இந்தியா பொருளாதார வளர்ச்சியில் 5-வது இடத்தைப் பிடித்துள்ளது. உலகின் ஐந்தாவது பெரிய பொருளாதார நாடான இந்தியாவில் ஏராளமான பயன்படுத்திக்கொள்ளப்படாத வாய்ப்புகள் நிறையவே உள்ளன. 2023-24 நிதியாண்டின் அக்டோபர்-டிசம்பர் காலாண்டில் ஜிடிபி வளர்ச்சி 8.4சதவீதமாக அதிகரித்துள்ள நிலையில் உலகளவில் வேகமாக வளரும் நாடாக இந்திய தனது நிலையை தக்கவைத்துக் கொண்டுள்ளது.
சர்வதேச செலாவணி நிதியத்தின் கணிப்புகள் இந்தியாவின் பொருளாதார எதிர்பார்ப்புகளை மேலும் வலுப்படுத்துகின்றன.
2024-ம் ஆண்டுக்கான வளர்ச்சி விகிதம் 6.8 சதவீதமாக இருக்கும் என்று கணிக்கப்பட்டுள்ளது. எனவே இந்திய சந்தையில் வணிகத்துக்கான வாய்ப்புகளை நாம் முறையாக பயன்படுத்திக் கொள்ள வேண்டும். இவ்வாறு பஃபெட் தெரிவித்தார்.
&w=1200&resize=1200,675&ssl=1)
