”ஆப் கி பார் மோடி சர்கார் உருவாக்கம்; நாட்டிற்கான கடமையாக ஏற்று செய்தவர் பாண்டே” – பியூஷ் கோயல்   | இந்தியா

விளம்பரத்துறையில் மக்களை ஈர்க்கும் ‘வாசகம்’ மூலம் தனக்கென தனி முத்திரை பதித்தவர் பியூஷ் பாண்டே. டைரி மில்க், ஏசியன் பெயிண்ட்ஸ், வோடோபோன் பக் நாய்க்குட்டி உள்ளிட்ட பல்வேறு விளம்பரங்களை உருவாக்கியவர் பியூஷ் பாண்டே. இந்திய விளம்பரத்துறையில் முன்னோடியாக திகழ்ந்தார். ஏசியன் பெயின்ட்டுக்கு இவரின் ‘மகிழ்ச்சிக்கும் நிறமுண்டு’ என இந்தியில் இவர் உருவாக்கிய வாசகம் மிகவும் பிரபலம்.

2014ஆம் ஆண்டு பொதுத் தேர்தலின் போது இவர் உருவாக்கிய ஆப் கி பார் மோடி சர்கார் என்ற வாசகம், பிரதமர் மோடியின் வெற்றிக்கு பெரும் பங்காற்றியதாக கூறப்பட்டது. பத்ம ஸ்ரீ விருது பெற்ற இவர், உடல்நலக்குறைவு காரணமாக கடந்த 24ஆம் தேதி காலமானார்.

இந்நிலையில் இன்று பியூஷ் பாண்டேவின் நினைவேந்தல் நிகழ்ச்சி நடைபெற்றது. இதில் மத்திய அமைச்சர் பியூஷ் கோயல் பங்கேற்றார். நிகழ்ச்சியில் பேசிய அவர், 2014ஆம் ஆண்டு பொதுத் தேர்தலின் போது அவர் ஆப் கி பார் மோடி சர்கார் வாசகத்தை உருவாக்கியதில் பின்னணியில் இருந்தவர் பியூஷ் பாண்டே எனத் தெரிவித்தார்.

இந்த நிகழ்வில் பியூஷ் கோயல், பிரதமர் நரேந்திர மோடியின் தேர்தல் பிரச்சாரத்திற்கு பியூஷ் பாண்டே முதலில் மறுத்ததையும் பிறகு அவர் கொடுத்த தேர்தல் பிரச்சார வாக்கியத்தையும் நினைவுகூர்ந்து பேசினார்.

“பியூஷ் பாண்டேவுடன் இதற்காக நான் ஏழு மணி நேரம் அமர்ந்து அவரை சமாதானம் செய்தும் அவர் தொடர்ந்து மறுப்பு தெரிவித்தார். மறு நாள் காலை என்னை அழைத்த அவர், ‘யே தேஷ் கி ஜரூரத் ஹை’ (இதுதான் நாட்டின் தேவை) என்று தெரிவித்தார். பியூஷ் பாண்டே பொதுவாக தேர்தல் பிரச்சாரங்களை செய்ததில்லை. ஆனால், இதனை நாட்டிற்கான கடமையாக ஏற்று செய்தார்.