ஆசிரியர் நியமனப் பரீட்சை சர்ச்சைக்கு முற்றுப்புள்ளி: கல்வி அமைச்சின் அறிவிப்பு

தேசிய மற்றும் மாகாண பாடசாலைகளில் சிங்களம், தமிழ் மற்றும் ஆங்கில மொழிகளிலான ஆசிரியர் வெற்றிடங்களை நிரப்புவதற்காக நடத்தப்பட்ட போட்டிப் பரீட்சையின் அடிப்படையில், நேர்முகப் பரீட்சைக்குத் தெரிவு செய்யப்பட்ட விண்ணப்பதாரர்களின் எண்ணிக்கை தொடர்பாக எழுந்த சர்சைகளுக்கு விளக்கமளிக்கப்பட்டுள்ளது.

கல்வி, உயர்கல்வி மற்றும் தொழிற்கல்வி அமைச்சு இது தொடர்பில் தெளிவுபடுத்தலொன்றை வெளியிட்டுள்ளது.

ஆசிரியர் சேவைப் பிரமாணக் குறிப்பின்படி (Teacher Service Minute) வெற்றிடங்களின் எண்ணிக்கையை விட இருமடங்கு விண்ணப்பதாரர்கள் நேர்முகப் பரீட்சைக்கு அழைக்கப்பட வேண்டும் என்பதால் வெளியிடப்பட்ட பெயர்ப்பட்டியல் குறித்த சர்ச்சைகளுக்குப் பதிலளிக்கும் வகையில் அமைச்சின் மேலதிக செயலாளர் ஏ.ஜே.எஸ்.எஸ். எதிரிசூரிய இதற்குரிய மாற்றங்களை விளக்கியுள்ளார்.

நேர்முகப் பரீட்சை

இதனடிப்படையில் தேசிய மற்றும் மாகாண பாடசாலைகளில் 23,600 ஆசிரியர் வெற்றிடங்களை நிரப்புவதற்காக அரசாங்கத்தால் அனுமதி பெறப்பட்டுள்ளது.

பிரமாணக் குறிப்பின்படி 23,600 வெற்றிடங்களுக்கு இருமடங்காக 46,012 விண்ணப்பதாரர்கள் நேர்முகப் பரீட்சைக்கு அழைக்கப்பட வேண்டும்.

ஆனால், வெளியிடப்பட்ட ஆரம்பக் கட்டப் பட்டியலில் 17,688 பேரின் பெயர்கள் மட்டுமே இடம்பெற்றிருந்தமை விண்ணப்பதாரர்கள் மத்தியில் சர்ச்சையை ஏற்படுத்தியது.

தனிப்பட்ட விண்ணப்பதாரர் ஒருவர் தேசிய மற்றும் மாகாண மட்டங்களில் ஒன்றுக்கும் மேற்பட்ட பாடங்கள் மற்றும் பதவிகளுக்குத் தகுதி பெற்றுள்ளமையாலேயே பட்டியலில் பெயர்களின் எண்ணிக்கை குறைவாகக் காணப்படுகிறது எனக் கல்வி அமைச்சு சுட்டிக்காட்டியுள்ளது. 

ஆட்சேர்ப்புத் திட்டம்

வரையறுக்கப்பட்ட ஆட்சேர்ப்புத் திட்டத்தின் கீழ் அரச சேவையில் பணியாற்றும் 192 பட்டதாரிகள், எட்டுப் பாடங்களிலும் தகுதி பெற்றுள்ளதன் மூலம் அவர்கள் மட்டுமே 1,536 வெற்றிடங்களை பூர்த்தி செய்யக்கூடிய தகுதியைப் பெற்றுள்ளனர்.

இவ்வாறாக விண்ணப்பதாரர்கள் பல பாடங்களுக்குத் தகுதி பெற்றுள்ளதை மதிப்பீடு செய்கையில், உண்மையில் 46,018 தகுதியான விண்ணப்பதாரர்கள் நேர்முகப் பரீட்சை செயல்முறைக்குத் தகுதி பெற்றுள்ளமை உறுதி செய்யப்பட்டுள்ளது.

குறிப்பிட்ட சில பாடச் சேர்க்கைகளில் போதிய தகுதியான விண்ணப்பதாரர்கள் இல்லாததால் சில வெற்றிடங்கள் நிரப்பப்படாமல் எஞ்சியுள்ளதாக அமைச்சு தெரிவித்துள்ளது.

மாகாண மட்டங்களில் 41 பாடச் சேர்க்கைகளுக்கு எந்தவொரு விண்ணப்பதாரரும் தகுதி பெறவில்லை எனவும், மேலும் 124 பாடச் சேர்க்கைகளில் தேவையான எண்ணிக்கையிலான தகுதியான விண்ணப்பதாரர்கள் கிடைக்கப் பெறவில்லை எனவும் அமைச்சு வெளிப்படுத்தியுள்ளமை குறிப்பிடத்தக்கது.