காஜாங் மாஜிஸ்திரேட் நீதிமன்றத்தில் 14 வயது சிறுவன் ஆசிரியரை அடித்த குற்றத்தை ஒப்புக்கொண்டான். இச்சம்பவம் சமூக ஊடகங்களில் வைரலானது குறிப்பிடத்தக்கது. மாஜிஸ்திரேட் ஃபாடின் டயானா ஜலீல் முன் அச்சிறுவன் மனு தாக்கல் செய்ததாக ஹரியான் மெட்ரோ செய்தி வெளியிட்டுள்ளது. குற்றச்சாட்டின்படி, திங்கட்கிழமை மாலை 4.48 மணிக்கு, இடைநிலைப்பள்ளியில் படிவம் ஒன்று வகுப்பு மாணவர் 29 வயது ஆசிரியருக்கு தானாக முன்வந்து காயம் ஏற்படுத்தினார். துணை அரசு வழக்கறிஞர் சியாபிக் சுல்பஹ்ரின் வழக்கினை நடத்திய வேளையில் சிறுவன் சார்பாக வழக்கறிஞர் எஸ். பிரியலதா ஆஜரானார். குற்றம் சாட்டப்பட்டவர் ஒரு சிறார் என்பதால் ஊடகவியலாளர்கள் நீதிமன்ற அறைக்குள் அனுமதிக்கப்படவில்லை என்று அறிக்கை கூறுகிறது.
சிறுவனின் பெற்றோர் விசாரணையில் கலந்துகொள்வதைக் காண முடிந்தது. 40 வயதுடைய அவனது தாயார், தனக்கு அவன் ஒரே மகன் என்றும் தனது தந்தையிடமிருந்து பிரிந்த பிறகு தன்னுடன் வசித்து வந்ததாகவும் செய்தியாளர்களிடம் கூறினார். தனது மகன் ஆசிரியரை அடித்ததற்கு வருத்தம் தெரிவித்ததாகவும், அவரிடம் மன்னிப்பு கேட்டதாகவும் அவர் கூறினார்.
முன்னதாக, வழக்கின் தீவிரத்தன்மையும் அது பொதுமக்களின் கவனத்தைக் காரணம் காட்டி, ஒருவரின் உத்தரவாதத்துடன் 5,000 ரிங்கிட் ஜாமீனை அரசு தரப்பு முன்மொழிந்தது. சிறுவன் பள்ளிக்குச் செல்லும் சிறார் குற்றவாளி என்பதைக் குறிப்பிட்டு, பிரதிவாதி தரப்பு குறைந்த தொகையைக் கோரியது. நீதிமன்றம் ஒரு நபர் உத்தரவாதத்துடன் 1,000 ரிங்கிட் ஜாமீனை நிர்ணயித்து, தண்டனை வழங்குவதற்கு முன் சமூக நலத்துறை ஒரு நன்னடத்தை அறிக்கையை சமர்ப்பிக்க செப்டம்பர் 11 ஆம் தேதியை நிர்ணயித்தது.
