அரச சேவையில் நிலவும் வெற்றிடங்களை பூர்த்தி செய்வதற்காக, புதிதாக 72,000 பேரை இணைத்துக் கொள்ள அரசாங்கம் தீர்மானித்துள்ளதாக தொழிலாளர் அமைச்சரும் நிதி மற்றும் திட்டமிடல் இராஜாங்க அமைச்சருமான அனில் ஜயந்த பெர்னாண்டோ தெரிவித்தார்.
2026ஆம் ஆண்டில் பொதுமக்களுக்கு மிகவும் அத்தியாவசியமான மற்றும் நேரடியாக தொடர்புடைய சேவைகளை வழங்கும் அரசு நிறுவனங்கள் உட்பட, முழு அரச சேவையிலும் காணப்படும் பணியாளர் வெற்றிடங்கள் நிரப்பப்படவுள்ளதாக அவர் குறிப்பிட்டார். இதற்கான தேவையான ஒப்புதலையும், சுமார் 20 பில்லியன் ரூபாய் நிதி ஒதுக்கீட்டையும் அரசாங்கம் ஏற்கெனவே வழங்கியுள்ளதாகவும் அமைச்சர் தெரிவித்தார்.
பொருளாதார மேம்பாடு மற்றும் நிதி மற்றும் திட்டமிடல் அமைச்சராக ஜனாதிபதி அநுரகுமார திசாநாயக்க வழங்கிய வழிகாட்டுதல்களின் அடிப்படையிலேயே இந்த ஆட்சேர்ப்பு நடவடிக்கை முன்னெடுக்கப்படவுள்ளதாகவும் கூறப்பட்டுள்ளது. அரச சேவையில் உள்ள அந்தந்த வெற்றிடங்களுக்கு பட்டதாரிகள் உட்பட அனைவரும் போட்டித் தேர்வுகளை எதிர்கொண்ட பின்னரே நியமனம் வழங்கப்படும் என அமைச்சர் தெளிவுபடுத்தினார்.
வெளிப்படைத்தன்மையும் திறமைகளும் கொண்ட ஒரு வலுவான பணியாளர் குழுவை அரச சேவையில் உருவாக்குவது, பொதுமக்களுக்கு தரமான மற்றும் நேர்மையான சேவைகளை வழங்குவதில் முக்கிய பங்காற்றும் என்றும் அவர் சுட்டிக்காட்டினார்.
மேலும், ஒவ்வொரு ஆண்டும் சுமார் 25,000 அரச ஊழியர்கள் ஓய்வு பெறுவதால், அவர்களுக்கு மாற்றாக புதியவர்களை நியமிப்பது அவசியமாகியுள்ளது. அதற்கமைய, பிரதமர் ஹரிணி அமரசூரிய தலைமையிலான குழுவின் பரிந்துரைகளின் அடிப்படையில், அமைச்சுகள், கூட்டுத்தாபனங்கள், சட்டரீதியான வாரியங்கள் மற்றும் பிற பொது நிறுவனங்களில் உள்ள பணியாளர் வெற்றிடங்களை விரைவாக நிரப்ப அரசாங்கம் ஒப்புதல் வழங்கியுள்ளதாக அமைச்சர் கூறினார்.
பொது மக்களுக்கு நேர்மையான அரச சேவையை உறுதிப்படுத்தும் நோக்கில், அரச ஊழியர்களின் சம்பள உயர்வுக்கும், புதிய ஆட்சேர்ப்புகளுக்கும் நாட்டின் வரலாற்றில் இதுவரை இல்லாத அளவு நிதி ஒதுக்கப்படும் ஆண்டாக 2026ஆம் ஆண்டு பதிவாகும் என அமைச்சர் அனில் ஜயந்த பெர்னாண்டோ மேலும் தெரிவித்துள்ளார்.
