இங்கிலாந்துக்கு எதிரான 5 ஆவது டெஸ்ட் போட்டி… முதல் நாளிலேயே ஆதிக்கம் செலுத்திய இந்திய அணி…

இங்கிலாந்து அணிக்கு எதிரான 5 ஆவது டெஸ்ட் கிரிக்கெட் போட்டியின் முதல் நாளிலேயே இந்திய அணி ஆதிக்கம் செலுத்தியுள்ளது. முதல் இன்னிங்ஸில் இங்கிலாந்தை ஆல் அவுட் செய்துள்ள இந்திய அணி, பேட்டிங்கிலும் அதிரடியாக ரன்கள் குவித்திருப்பதால் ரசிகர்கள் உற்சாகம் அடைந்துள்ளனர்.

இந்த போட்டியில்டாஸ் வென்ற இங்கிலாந்து அணி கேப்டன் பென் ஸ்டோக்ஸ் பேட்டிங்கை தேர்வு செய்தார். இந்திய அணியில் ரஜத் பட்டிதாருக்கு பதிலாக தேவ்தத் படிக்கல்லும், ஆகாஷ் தீபிற்கு பதிலாக பும்ராவும் களத்தில் இறங்கினர்.

இங்கிலாந்து அணி முதல் இன்னிங்ஸில் அனைத்து விக்கெட்டுகளையும் இழந்து  218 ரன்கள் மட்டுமே எடுத்தது. அதிகபட்சமாக அந்த அணியின் தொடக்க பேட்ஸ்மேன் ஸாக் க்ராவ்லே 79 ரன்கள் எடுத்தார். இந்திய அணி தரப்பில் குல்தீப் யாதவ் 5 விக்கெட்டுகளையும், ரவிச்சந்திரன் அஷ்வின் 4 விக்கெட்டுகளையும் வீழ்த்தினர். ஜடேஜா 1 விக்கெட்டை கைப்பற்றினார். இந்த இன்னிங்ஸில் இந்திய அணியின் ஸ்பின்னர்கள் மட்டுமே அனைத்து விக்கெட்டுகளையும் சாய்த்துள்ளனர்.

இந்த போட்டியில் விராட் கோலியின் ஒரு டெஸ்ட் தொடரில் 4 ஆவது அதிக ரன்கள் எடுத்த இந்தியர் என்ற சாதனையை யஷஸ்வி ஜெய்ஸ்வால் முறியடித்துள்ளார்.

2016 – 17 இல் இங்கிலாந்துக்கு எதிரான டெஸ்ட் தொடரில் விராட் கோலி 655 ரன்கள் எடுத்திருந்தார். அந்த சாதனையை 656 ரன்கள் எடுத்து தற்போது முறியடித்துள்ளார் யஷஸ்வி ஜெய்ஸ்வால்.

தொடர்ந்து தனது முதல் இன்னிங்சை தொடங்கிய இந்திய அணிக்கு கேப்டன் ரோஹித் சர்மாவும், யஷஸ்வி ஜெய்ஸ்வாலும் சிறப்பான தொடக்கத்தை கொடுத்தனர். இருவரும் ஒருநாள் போட்டிகளைப் போன்று விளையாட ரன் குவிப்பு வேகம் எகிறத் தொடங்கியது.

58 பந்துகளில் 3 சிக்சர் 5 பவுண்டரியுடன் ஜெஸ்வால் 57 ரன்கள் குவித்து ஆட்டமிழந்தார். இன்றைய முதல் நாள் ஆட்டத்தில் 30 ஓவர்கள் முடிவில் 1 விக்கெட்டை மட்டுமே இழந்த இந்திய அணி 135 ரன்கள் எடுத்தது. கேப்டன் ரோஹித் சர்மா 2 சிக்சர் 6 பவுண்டரியுடன் 52 ரன்களும், சுப்மன் கில் 2 சிக்சர் 2 பவுண்டரியுடன் 26 ரன்களும் எடுத்து களத்தில் உள்ளனர்.

முதல் இன்னிங்ஸில் இங்கிலாந்தை விட இந்திய அணி 83 ரன்கள் மட்டுமே பின்தங்கியுள்ளது. முதல் நாளிலேயே இந்திய அணி ஆதிக்கம் செலுத்தியுள்ள நிலையில் இன்னும் 4 நாட்கள் ஆட்டம் மீதம் இருப்பதால், இந்த போட்டியிலும் இந்திய அணி வெற்றி பெற அதிக வாய்ப்புள்ளதாக கூறப்படுகிறது.

உலகம் முதல் உள்ளூர் வரை இன்றைய முக்கிய செய்திகள் (Top Tamil News, Breaking News), அண்மைச் செய்திகள் (Latest Tamil News), அனைத்தையும் நியூஸ்18 தமிழ் (News18Tamil.com) இணையதளத்தில் உடனுக்குடன் அறியலாம். News 18 தமிழ் : வாட்ஸ் அப் சேனலை ஃபாலோ செய்யுங்கள்.
நியூஸ்18 தமிழ்நாடு தொலைக்காட்சியை, ARASU CABLE – 46, TCCL – 57, SCV – 28, VK Digital – 30, SUN DIRECT DTH: 71, TATA PLAY: 1562, D2H: 2977, AIRTEL: 782, DISH TV:2977 ஆகிய அலைவரிசைகளில் காணலாம்…