கோலாலம்பூர்:
சமீபத்தில் காவல்துறை சோதனையின் போது அதிகாரிகளை இழிவுபடுத்தி கேள்வி எழுப்பியதாக குற்றம் சாட்டப்பட்ட ‘இன்ஸ்பெக்டர் ஷீலா’ விரைவில் நீதிமன்றத்தில் குற்றஞ்சாட்டை எதிர்கொள்ளவுள்ளதாக கோலாலம்பூர் காவல் துறைத் தலைவர் டத்தோ பாடில் மார்சூஸ் தெரிவித்துள்ளார்.
தீபாவளி கொண்டாட்ட விருந்து நிகழ்விற்குப் பின் ஊடகங்களுடன் பேசிய அவர்,“இந்த வழக்குக்கான விசாரணை முடிவடைந்துள்ளது. சம்பந்தப்பட்ட அறிக்கை அரசு தரப்பு துணை வழக்கறிஞர் அலுவலகத்துக்கு அனுப்பப்பட்டுள்ளது. விரைவில் குற்றஞ்சாட்டு பதிவு செய்யப்படும்,” என்று கூறினார்.
சம்பவம் சமீபத்தில் சமூக ஊடகங்களில் பரவலாக பகிரப்பட்ட வீடியோ ஒன்றின் மூலம் வெளிச்சத்துக்குவந்தது. அதில் ஷீலா, சாலையோர சோதனையின் போது காவல் அதிகாரிகளின் நடவடிக்கையை கடுமையாக விமர்சித்தார். இந்த வீடியோ பல்வேறு தளங்களில் பரவியதுடன், போலீஸ் துறையின் நடைமுறைகள் மற்றும் பொது நெறிமுறைகள் குறித்து விவாதங்களைத் தூண்டியுள்ளது.
‘இன்ஸ்பெக்டர் ஷீலா’ முன்பும் சமூக ஊடகங்களில் சர்ச்சைக்குரிய கருத்துகள் மற்றும் நேரலைகளால் கவனத்தை ஈர்த்தவர். 2023ஆம் ஆண்டில் அவர் மீது மூன்று தனித்தனி குற்றச்சாட்டுகள் பதிவு செய்யப்பட்டு நீதிமன்றத்தில் நிறுத்தப்பட்டிருந்தது குறிப்பிடத்தக்கது.
புதிய வழக்கு, சட்ட அமலாக்க அதிகாரிகள் மற்றும் குடிமக்கள் இடையிலான நடத்தைப் பொறுப்புகள், சமூக ஊடக ஒழுக்கம் போன்ற கேள்விகளை மீண்டும் முன்வைத்துள்ளது.
“என் வாடிக்கையாளர் விசாரணையில் முழுமையாக ஒத்துழைத்துள்ளார். வரவிருக்கும் நீதிமன்ற நடைமுறைகளை மதித்து செயல்படுவோம்,”
என்று, ஷீலாவின் வழக்கறிஞர் எம். மனோகரன் தெரிவித்துள்ளார்.
