புதிய அமைச்சரவைக்கான பெயர்களை முன்மொழியச் செய்தியாளர்களை அழைத்தபோது, அமைச்சரவை மறுசீரமைப்பு குறித்த கேள்வியைப் பிரதமர் அன்வார் இப்ராஹிம் இன்று ஒரு மகிழ்ச்சியான தருணமாக மாற்றினார்.
நகைச்சுவையுடன் பதிலளித்த அன்வார், ஊடகங்கள் தங்கள் பரிந்துரைகளை நேரடியாகத் தன்னிடம் சமர்ப்பிக்கலாம் என்றார்.
புத்ராஜெயா யோசனை விழா (Festival of Ideas) 2025 இன் நிறைவு விழாவை நடத்தி முடித்தபிறகு, “உங்களிடம் ஏதேனும் ஆலோசனைகள் இருந்தால் எனக்குத் தரவும்… அதை எனக்கு அனுப்புங்கள்,” என்று அவர் கூறினார்.
அடுத்த மாத தொடக்கத்தில் பல அமைச்சர்கள் மற்றும் துணை அமைச்சர்களின் செனட்டர் பதவிகள் காலாவதியாகவுள்ளதால், அவர்கள் பதவி விலக வேண்டியிருக்கும் என்ற தகவல்கள் வெளியாகியுள்ள நிலையில், அமைச்சரவை மாற்றம்குறித்த ஊகங்கள் மீண்டும் எழுந்துள்ளன.
அவர்களில் உயர்கல்வி அமைச்சர் ஜாம்ப்ரி அப்த் காதிர், உள்துறை அமைச்சர் சைபுதீன் நசுதின் இஸ்மாயில், முதலீடு, வர்த்தகம் மற்றும் தொழில்துறை அமைச்சர் டெங்கு ஜஃப்ருல் அப்துல் அஜிஸ் மற்றும் பிரதமர் துறை அமைச்சர் (மத விவகாரங்கள்) நயிம் மொக்தார் ஆகியோர் அடங்குவர்.
‘நீட்டிப்பு சாத்தியம்பற்றித் தெரியாது’
முன்னதாக, அதே நிகழ்வின்போது தனது நிலைப்பாடுகுறித்த நிச்சயமற்ற தன்மையைக் குறிப்பிட்டு சாம்ப்ரியும் கவனத்தை ஈர்த்தார்.
“நான் ஒரு கேபினட் அமைச்சராக இருக்கிறேனா இல்லையா என்பது இரண்டாம் பட்சம்தான், ஆனால் இது (FOI) ஒரு தேசிய நிகழ்ச்சி நிரல். எனது பதவிக்காலம் விரைவில் முடிவடையும், ஒருவேளை இரண்டு அல்லது மூன்று வாரங்கள் மட்டுமே மீதமுள்ளது,” என்று அவர் கூறினார்.
டிசம்பர் 3, 2022 அன்று அமைச்சரவையில் நியமிக்கப்பட்ட நான்கு செனட்டர்களில் ஜாம்ப்ரியும் ஒருவர், மேலும் அவர்களின் பதவிக்காலம் இந்த ஆண்டு டிசம்பர் 2 ஆம் தேதியுடன் முடிவடைகிறது.
உயர்கல்வி அமைச்சர் ஜாம்ப்ரி அப்துல் காதிர்
தனது பதவிக்கால நீட்டிப்பு குறித்து கேட்டதற்கு, எந்த முடிவும் தனக்குத் தெரியாது என்று கூறிய சாம்ப்ரி, “தேவைப்படும் வரை” அமைச்சராகத் தனது கடமைகளைத் தொடர்ந்து செய்வேன் என்றும் கூறினார்.
இந்த நிகழ்வில் கல்வி அமைச்சர் பத்லினா சிடெக், பிரதமர் துறை (கூட்டாட்சி பிரதேசங்கள்) அமைச்சர் டாக்டர் சாலிஹா முஸ்தபா மற்றும் அரசாங்கத்தின் தலைமைச் செயலாளர் ஷம்சுல் அஸ்ரி அபு பக்கர் ஆகியோரும் கலந்து கொண்டனர்.
