சிங்கப்பூரில் பிரபலமான முஸ்தபா சென்டர், வாடிக்கையாளர்களின் கோரிக்கைகளை ஏற்கும் விதமாக அதன் ஆன்லைன் விற்பனை தளத்தைத் தொடங்கியுள்ளது.
தங்கள் போட்டியாளர்கள் ஏற்கனவே ஆன்லைன் விற்பனையில் காலடியெடுத்து வைத்ததற்கு பிறகு புதிய விற்பனை தளத்தில் நுழைவதை முஸ்தபா நிறுவனம் ஒப்புக்கொண்டது.
மற்ற ஆன்லைன் விற்பனையாளர்களிடமிருந்து பாடங்களை கற்றுக் கொண்டவாறே இந்த புதிய சேவையை நிதி இழப்பில்லாமல் செய்ய கவனம் செலுத்தப்போவதாக அது சொன்னது.
50 ஆண்டுகளுக்கும் மேலான வர்த்தகத்தில் ஜொலித்து வரும் முஸ்தபா சென்டர், shopmustafa.sg என்ற அதன் ஆன்லைன் கடையை அக்டோபர் 28 அன்று தொடங்கியது.
தொடக்கம் என்பதால் வெறும் 3,000 தயாரிப்புகளுடன் இந்த ஆன்லைன் சேவையை முஸ்தபா சென்டர் வழங்குகிறது. ஒவ்வொரு மாதமும் கூடுதலாக 1000 பொருட்களை சேர்க்க திட்டமிடப்பட்டுள்ளது.
தற்போது S$150 வெள்ளிக்கு குறைவான பொருட்களை ஆர்டர் செய்தால் டெலிவரி கட்டணமாக S$10 வெள்ளி வசூல் செய்யப்படும், $150க்கு மேல் ஆர்டர் செய்தால் டெலிவரி இலவசம்.
சையத் அல்வி சாலையில் 24 மணி நேரமும் இயங்கும் முஸ்தபா, உள்ளூர்வாசிகளுக்கும் சுற்றுலாப் பயணிகளுக்கும் தவிர்க்கமுடியாத முக்கிய ஷாப்பிங் கடையாக மாறியுள்ளது.
முதன்முதலில் 1971 ஆம் ஆண்டு கேம்பல் லேனில் முஸ்தபா சென்டர் திறக்கப்பட்டது, பின்னர் படிப்படியாக வளர்ச்சி பெற்று செராங்கூன் சாலை மற்றும் செராங்கூன் பிளாசாவில் விரிவடைந்த நிறுவனம், 1995 இல் தற்போது அமைந்துள்ள இடத்தில் திறக்கப்பட்டது.
