புதுடெல்லி: தற்சார்பு இந்தியாவுக்கான திட்டத்தின் கீழ் அடுத்த 6 ஆண்டுகளில் மரபணு திருத்தப்பட்ட பருப்பு வகைகளை பயிரிட மத்திய அரசு திட்டமிட்டுள்ளது. அதன்படி, உளுந்து, துவரை மற்றும் மசூர் ஆகிய மூன்று பருப்பு வகைகளின் கீ்ழ் 15 மரபணு திருத்தப்பட்ட வகைகளை வெளியிட மத்திய அரசு திட்டமிட்டுள்ளதாக கூறப்படுகிறது.
மத்திய வேளாண் மற்றும் விவசாயிகள் நல அமைச்சகம் சமீபத்தில் தற்சார்பு இந்தியாவுக்கான செயல்பாட்டு வழிகாட்டுதல்களை வெளியிட்டது. அதில் மரபணு திருத்தப்பட்ட பருப்பு வகைகளின் உருவாக்கமும் ஒன்றாகும்.
இந்தத் திட்டத்தின் கீழ் உற்பத்தித்திறனை அதிகரிக்க குறுகிய கால மற்றும் கலப்பின பருப்பு வகைகளுடன் அதிக மகசூல் தரும் வகைகளை உருவாக்குவதற்கான முயற்சிகள் மேற்கொள்ளப்படும் என்று தெரிவிக்கப்பட்டுள்ளது.
வளர்ந்து வரும் சவால்களை எதிர்கொள்ள, காலநிலை-எதிர்ப்பு மற்றும் பூச்சி எதிர்ப்பு வகைகளை உருவாக்கம் செய்வதிலும் கவனம் செலுத்தப்படும். பரவலான தத்தெடுப்பை உறுதி செய்வதற்காக, முக்கிய பருப்பு வகைகளை வளர்க்கும் மாநிலங்களில் சோதனைகள் நடத்தப்படும்.
மேலும் நிலையான பருப்பு வகை சாகுபடிக்காக மரபணு-திருத்தப்பட்ட வகைகளின் வளர்ச்சியை ஆதரிக்க தேவையான ஆராய்ச்சிகள் மேலும் முன்னெடுக்கப்படும் என்று அக்டோபர் 18 அன்று வெளியிடப்பட்ட வழிகாட்டுதல்களில் குறிப்பிடப்பட்டுள்ளன.
