யாழ்ப்பாணத்தில் இயங்கிவரும் சில மோசடி கும்பல்கள், சமூக வலைத்தளங்கள் மற்றும் இணையதளங்களை பயன்படுத்தி பாரிய பண மோசடிகளில் ஈடுபட்டு வருவதாக அதிர்ச்சி தகவல்கள் வெளியாகியுள்ளன. யாழ்ப்பாணத்தில் உள்ள பிரபல தனியார் விடுதிகளின் பெயர்களை பயன்படுத்தி, “பெண்களுடன் உல்லாசமாக இருக்க முடியும்” என விளம்பரம் செய்து, அப்பாவிகளிடம் பணம் பறிக்கும் செயல் அம்பலமாகியுள்ளது.
இந்த மோசடி கும்பல், முகங்கள் மறைக்கப்பட்ட பெண்களின் கவர்ச்சிகரமான புகைப்படங்களை விளம்பரப்படுத்தி, “10,000 ரூபாய் முதல் 20,000 ரூபாய் செலவில்” பெண்களுடன் உல்லாச சேவைகளை பெறலாம் என கவர்ந்திழுக்கிறது. இந்த விளம்பரங்களை நம்பி தொடர்பு கொள்ளும் நபர்களிடம், குறிப்பிட்ட தனியார் விடுதியில் பெண் தயாராக இருப்பதாக கூறி, பணத்தை வங்கி வைப்பில் செலுத்த சொல்கின்றனர்.
பணத்தை செலுத்திய பிறகு, குறித்த விடுதிக்கு செல்லும் போதுதான் தாம் ஏமாற்றப்பட்டதை பணமளித்தவர்கள் உணர்கின்றனர். அதற்குள் மோசடிக்காரர்களின் தொலைபேசி இலக்கங்கள் செயலிழந்துவிடுகின்றன. பாதிக்கப்பட்டவர்கள் அவமானத்தால் பொலிஸில் முறைப்பாடு செய்ய தயங்குவதால், இந்த கும்பல் தொடர்ந்து தங்களது மோசடிகளை அரங்கேற்றி வருவதாக கூறப்படுகிறது.
இந்த மோசடி கும்பல்கள் யாழ்ப்பாணத்தின் பிரபலமான தனியார் தங்குமிட விடுதிகளின் பெயர்களை பயன்படுத்தி வருவதால், அந்த விடுதிகளின் நற்பெயருக்கு களங்கம் ஏற்படுவதாக உரிமையாளர்கள் கவலை தெரிவிக்கின்றனர்.
பொலிஸார் இந்த சமூக வலைத்தள மோசடிகள் குறித்து உடனடி கவனம் செலுத்தி, குற்றவாளிகளை கைது செய்ய நடவடிக்கை எடுக்க வேண்டும் என விடுதி உரிமையாளர்கள் கோரிக்கை விடுத்துள்ளனர். பொதுமக்களும் இவ்வாறான கவர்ச்சிகரமான விளம்பரங்களை நம்பி ஏமாற வேண்டாம் என எச்சரிக்கப்பட்டுள்ளது.
