நியூயார்க்: யுஎஸ் ஓபன் டென்னிஸ் தொடரில் ஸ்பெயினின் கார்லோஸ் அல்கராஸ், செர்பியாவின் நோவக் ஜோகோவிச், பெலாரஸின் அரினா சபலென்கா, அமெரிக்காவின் ஜெசிகா பெகுலா உள்ளிட்டோர் கால் இறுதி சுற்றுக்கு முன்னேறினர்.
அமெரிக்காவின் நியூயார்க் நகரில் நடைபெற்று வரும் இந்தத் தொடரில் ஆடவர் ஒற்றையர் பிரிவு 4-வது சுற்றில் 2-ம் நிலை வீரரான ஸ்பெயினின் கார்லோஸ் அல்கராஸ், 82-ம் நிலை வீரரான பிரான்ஸின் ஆர்தர் ரிண்டர்க்னெக்குடன் மோதினார். இதில் கார்லோஸ் அல்கராஸ் 7-6 (7-3), 6-3, 6-4 என்ற செட் கணக்கில் வெற்றி பெற்று கால் இறுதி சுற்றுக்கு முன்னேறினார்.
கால் இறுதி சுற்றில் அல்கராஸ், 20-ம் நிலை வீரரான செக் குடியரசின் ஜிரி லெஹெக்காவுடன் மோதுகிறார். ஜிரி லெஹெக்கா 4-வது சுற்றில் 77-ம் நிலை வீரரான பிரான்ஸின் அட்ரியன் மன்னாரினோவை 7-6 (7-4), 6-4, 2-6, 6-2 என்ற செட் கணக்கில் தோற்கடித்தார். 7-ம் நிலை வீரரும் 4 முறை சாம்பியனுமான செர்பியாவின் நோவக் ஜோகோவிச் 4-வது சுற்றில் 144-ம் நிலை வீரரான ஜெர்மனியின் ஜான்-லெனார்ட் ஸ்ட்ரஃபுடன் மோதினார். இதில் ஜோகோவிச் 6-3, 6-3, 6-2 என்ற நேர் செட் கணக்கில் வெற்றி பெற்று கால் இறுதி சுற்றில் நுழைந்தார்.
கால் இறுதி சுற்றில் ஜோகோவிச், 4-ம் நிலை வீரரான அமெரிக்காவின் டெய்லர் ஃபிரிட்ஸை எதிர்கொள்கிறார். டெய்லர் ஃபிரிட்ஸ் 4-வது சுற்றில் 6-4, 6-3, 6-3 என்ற செட் கணக்கில் 21-ம் நிலை வீரரான செக் குடியரசின் தாமஸ் மச்சாக்கை தோற்கடித்தார். மகளிர் ஒற்றையர் பிரிவு 4-வது சுற்றில் முதல் நிலை வீராங்கனையும் நடப்பு சாம்பியனுமான பெலாரஸின் அரினா சபலென்கா, 95-ம் நிலை வீராங்கனையான ஸ்பெயினின் கிறிஸ்டினா புக்சாவுடன் மோதினார். இதில் அரினா சபலென்கா 6-1, 6-4 என்ற நேர் செட் கணக்கில் வெற்றி பெற்று கால் இறுதி சுற்றுக்கு முன்னேறினார்.
கால் இறுதி சுற்றில் சபலென்கா, செக் குடியரசின் மார்க்கெட்டா வோண்ட்ரசோவாவுடன் மோதுகிறார். தரவரிசையில் 60-வது இடத்தில் மார்க்கெட்டா வோண்ட்ரசோவா 4-வது சுற்றில் 9-ம் நிலை வீராங்கனையான கஜகஸ்தானின் எலெனா ரைபகினாவை தோற்கடித்தார். 4-ம் நிலை வீராங்கனையான அமெரிக்காவின் ஜெசிகா பெகுலா 4-வது சுற்றில் 58-ம் நிலை வீராங்கனையான சகநாட்டைச் சேர்ந்த அன் லியை எதிர்த்து விளையாடினார். இதில் ஜெசிகா பெகுலா 6-1, 6-2 என்ற செட் கணக்கில் வெற்றி பெற்று கால் இறுதி சுற்றில் கால்பதித்தார்.
காலிறுதி சுற்றில் ஜெசிகா பெகுலா, 62-ம் நிலை வீராங்கனையான செக் குடியரசின் பார்போரா கிரெஜிகோவாவுடன் பலப்பரீட்சை நடத்துகிறார். பார்போரா கிரெஜிகோவா 4-வது சுற்றில் 139-ம் நிலை வீராங்கனையான அமெரிக்காவின் டெய்லர் டவுன்செட்டை 1-6, 7-6 (15-13), 6-3 என்ற செட் கணக்கில் வீழ்த்தினார்.
2-வது சுற்றில் மாயா: யுஎஸ் ஓபன் டென்னிஸ் தொடரின் ஜூனியர் மகளிர் ஒற்றையர் பிரிவு முதல் சுற்றில் இந்தியாவின் மாயா ராஜேஷ்வரன், சீனாவின் ஜாங்-கியான் வெய் உடன் மோதினார். இதில், தமிழகத்தின் கோவையை சேர்ந்த 16 வயதான மாயா ராஜேஷ்வரன் 7-6 (7-5), 6-3 என்ற செட் கணக்கில் வெற்றி பெற்று 2-வது சுற்றுக்கு முன்னேறினார். ஸ்பெயினின் மல்லோர்காவில் உள்ள ரஃபேல் நடால் அகாடமியில் பயிற்சி பெற்று வரும் மாயா ராஜேஷ்வரன், 2-வது சுற்றில் போட்டி தரவரிசையில் 2-வது இடத்தில் உள்ள கிரேட் பிரிட்டனை சேர்ந்த ஹன்னா க்ளூக்மேனுடன் மோதுகிறார்.
ஆடவர் ஜூனியர் ஒற்றையர் பிரிவு முதல் சுற்றில் இந்தியாவின் ஹிதேஷ் 2-6, 4-6 என்ற செட் கணக்கில் அமெரிக்காவின் ஜெரிட் கெய்ன்ஸிடமும், கிறிஸ் தியாகி 3-6, 1-6 என்ற செட் கணக்கில் சுவீடனின் லுட்விக் ஹெடேவிடமும் தோல்வி அடைந்தனர்.
