உலகக்கோப்பை வென்ற கேப்டனுக்கு புற்றுநோய்… மூக்கில் அறுவை சிகிச்சை.. கவலையில் ரசிகர்கள்! | விளையாட்டு

முன்னாள் கிரிக்கெட் வீரர் மைக்கேல் கிளார்க்கிற்கு புற்றுநோய் பாதிப்பு இருப்பது கிரிக்கெட் ரசிகர்களை கவலையில் ஆழ்த்தியுள்ளது.

தோல் புற்றுநோயால் பாதிக்கப்பட்ட ஆஸ்திரேலியா கிரிக்கெட் அணியின் முன்னாள் கேப்டன் மைக்கேல் கிளார்க்கின் மூக்கின் ஒரு பகுதி அகற்றப்பட்டது. தனது இன்ஸ்டாகிராம் பக்கத்தில் பதிவிட்டுள்ள அவர், தான் தோல் புற்றுநோயால் பாதிக்கப்பட்டுள்ளதாகவும், தனது மூக்கின் ஒரு பகுதி அகற்றப்பட்டுள்ளதாகவும் குறிப்பிட்டுள்ளார். வரும் முன் காப்பதே சிறந்தது என்றும், தன்னை பொறுத்தவரை அடிக்கடி உடல் பரிசோதனை மேற்கொள்வது முக்கியம் என்றும் கூறியுள்ளார். தொடர்ந்து பரிசோதனை செய்ததாலேயே, புற்றுநோய் பாதிப்பை முன்கூட்டியே கண்டறிய முடிந்தது என்றும் கிளார்க் கூறியிருக்கிறார்.

44 வயதாகும் கிளார்க், 2006ல் முதன்முதலாக தோல் புற்றுநோயால் பாதிக்கப்பட்டார். அதன்பின், தொடர் மருத்துவ சிகிச்சைகளை மேற்கொண்ட அவர், தற்போது ஆறாவது முறையாக அறுவை சிகிச்சையை செய்திருக்கிறார்.

ஆஸ்திரேலிய அணியின் கேப்டனாக இருந்து உலகக்கோப்பை வென்றுகொடுத்த கிளார்க், மொத்தமாக அந்த அணிக்காக 115 டெஸ்ட், 245 ஒருநாள் போட்டிகள் மற்றும் 34 டி20 போட்டிகளில் விளையாடி உள்ளார். அதேபோல், சர்வதேச கிரிக்கெட்டில் 17,112 ரன்கள் எடுத்துள்ளார். 2004 முதல் 2015 வரையில் சர்வதேச கிரிக்கெட்டில் விளையாடிய அவருக்கு 2006-ல் தோல் புற்றுநோய் பாதிப்பு இருப்பது கண்டறியப்பட்டது.

சூரியனில் இருந்து வெளிவரும் புற ஊதா கதிர்வீச்சு காரணமாக தோல் புற்றுநோய் பாதிப்பு ஏற்படுவதாக சொல்லப்படுகிறது. இந்த வகையான புற்றுநோய் ஆஸ்திரேலியாவில் அதிகம் ஏற்படுவது தெரியவந்திருக்கிறது. மூன்றில் இரண்டு ஆஸ்திரேலியர்களுக்கு 70 வயதிற்குள் தோல் புற்றுநோய் இருப்பது கண்டறியப்படுவது அந்த நாட்டில் வழக்கமாக வருவதாகவும் சொல்லப்படுகிறது. ஆஸ்திரேலியாவை சேர்ந்த ஹாலிவுட் நடிகர் ஹக் ஜாக்மேன் என்பவரும் தோல் புற்றுநோய் பாதிப்புக்கு ஆளாகி சிகிச்சை பெற்றுவருகிறார் என்பது குறிப்பிடத்தக்கது.