பி.டி. உஷா மகனின் திருமணம்.. கேரள பாரம்பரியப்படி சேலை அணிந்து பங்கேற்ற மேரி கோம்.. | விளையாட்டு

இந்தியாவின் தடகள லெஜெண்டாக கருதப்படும் பி.டி. உஷா தற்போது மாநிலங்களவை உறுப்பினராகவும் பணியாற்றி வருகிறார். இந்திய தடகள விளையாட்டு பிரிவில் பி.டி. உஷா ஏற்படுத்திய சாதனைகளுக்காக அவருக்கு மாநிலங்களவை உறுப்பினர் பொறுப்பு வழங்கப்பட்டுள்ளது. 100க்கும் மேற்பட்ட சர்வதேச போட்டிகளில் கலந்து கொண்டுள்ள பி.டி. உஷா இந்தியாவுக்காக ஏராளமான பதக்கங்களை வென்றுள்ளார்.

அவரது விளையாட்டுத் திறமை சர்வதேச அரங்கில் இந்திய தடகள வீரர்களால் சாதிக்க முடியும் என்ற நம்பிக்கையை ஏற்படுத்தியது. இன்றைக்கும் தடகள துறையில் சாதிக்க விரும்பும் வீரர் வீராங்கனைகளுக்கு பி.டி. உஷா ஒரு வழிகாட்டியாக இருந்து வருகிறார்.

இந்த நிலையில் பி.டி. உஷாவின் மகனும் மருத்துவருமான விக்னேஷ் உஜ்வாலின் திருமணம் சமீபத்தில் நடைபெற்றது. கேரளாவில் நடந்த இந்த திருமண நிகழ்ச்சியில் பிரபல குத்துச்சண்டை வீராங்கனை மேரி கோம் பட்டுப்புடவை அணிந்து அதற்கு மேட்சிங் ஆக தங்க நகைகளுடன் கேரள பெண்ணை போல மாறி திருமணத்தில் கலந்து கொண்டார்.

நிகழ்ச்சியில் பரிமாறப்பட்ட இட்லி, வடை, சாம்பார் உள்ளிட்டவற்றை ருசித்து மகிழ்ந்தார் மேரி கோம். அப்போது சிலர் அதிகம் சாப்பிட்டால் உங்களுடைய பிட்னஸ் என்ன ஆகும் என்று கேட்டுள்ளனர். அதற்கு இந்த சாப்பாடு அதிகம் கிடையாது நான் அளவோடு தான் சாப்பிட்டு உள்ளேன் என்று கிண்டலாக மேரி கோம் பதில் அளித்துள்ளார்.

மணமகனான பி.டி. உஷாவின் மகன் விக்னேஷ் உஜ்வால் ஸ்போர்ட்ஸ் மெடிசின் துறையில் பட்டம் பெற்றுள்ளார். தற்போது அவர் பி.டி. உஷா நடத்திவரும் தடகளத்திற்கான பள்ளியில் மருத்துவராக பணியாற்றி வருகிறார்.