இந்தியாவில் மீண்டும் அறிமுகமாகிறதா டிக்டாக், அலி எக்ஸ்பிரஸ்…? உண்மை நிலவரம் என்ன…? | இந்தியா

2020 ஜூன் மாதத்தில், தேசிய பாதுகாப்பு காரணங்களால் மத்திய அரசு டிக்டாக் உட்பட 59 சீன செயலிகளை தடை செய்தது. அப்போது ஷேரிட், மி வீடியோ கால், கிளப் ஃபேக்டரி, கேம் ஸ்கேனர் போன்ற பிரபலமான செயலிகளும் அதில் இடம்பெற்றிருந்தன. அந்தக் காலகட்டத்தில், சீனாவுடனான எல்லை மோதல்களால் இரு நாடுகளின் உறவு மிகவும் மோசமான நிலையில் இருந்தது.

இப்போது, டிக்டாக் இணையதளம் மீண்டும் அணுகக்கூடியதாக இருப்பதால் டிக்டாக் ரசிகர்களிடையே ஆர்வம் அதிகரித்துள்ளது. இருப்பினும், டிக்டாக் அல்லது அதன் தாய் நிறுவனமான பைட் டான்ஸ் இந்தியா திரும்புவது குறித்து இதுவரை எந்த அதிகாரப்பூர்வ அறிவிப்பும் வெளியாகவில்லை.

2020-ல் டிக்டாக் தடைசெய்யப்பட்டபோது, பைட் டான்ஸ் ஒரே இரவில் 200 மில்லியனுக்கும் மேற்பட்ட இந்திய பயனர்களை இழந்தது. ஆனால், கடந்த சில ஆண்டுகளில் தற்போது இந்த சூழல் மாறியுள்ளது. இந்தியா – சீனா இடையேயான 24 சுற்று பேச்சுவார்த்தைகள் எல்லை பதற்றங்களை ஓரளவுக்கு தணித்துள்ளன. இரு நாடுகளுக்கும் இடையே விமான சேவைகளும் அறிவிக்கப்பட்டுள்ளன. மேலும், பிரதமர் நரேந்திர மோடி விரைவில் சீன அதிபர் ஜி ஜின்பிங்கை சந்திக்க உள்ளதாகவும் தகவல் வெளியாகி இருக்கிறது.

அலி எக்ஸ்பிரஸ் இணையதளமும் இந்திய பயனர்களுக்காக திறக்கப்பட்டுள்ளது. இருப்பினும், டிக்டாக் போலவே இங்கு பயன்பாடு கிடைக்கவில்லை, மாறாக இணையதளம் மட்டுமே செயல்படுகிறது. மொத்தத்தில், டிக்டாக் மற்றும் அலி எக்ஸ்பிரஸ் இணையத்தில் மீண்டும் தோன்றியிருப்பது ரசிகர்களுக்கு நம்பிக்கை அளிக்கும் செய்தியாக இருந்தாலும், அதிகாரப்பூர்வ உறுதிப்படுத்தல் வரும்வரை இது முழுமையான தீர்வாக இருக்காது.