ரஷ்ய அதிபர் புதின் உடனான சந்திப்புக்கு பின் அதிபர் டிரம்ப் வெளியிட்ட முக்கிய அறிவிப்பு | உலகம்

இருவரும் தனியே சந்திப்பார்கள் என முதலில் அறிவிக்கப்பட்ட நிலையில், கடைசிக்கட்டத்தில் இரண்டு தரப்பிலும் தலா 3 அதிகாரிகள் ஆலோசனைக் கூட்டத்தில் பங்கேற்றனர். மூடிய கதவுகளுக்கு பின்னால் சுமார் 3 மணிநேரம் பேச்சுவார்த்தை நடைபெற்றது.

இதனை தொடர்ந்து, அமெரிக்க அதிபர் டிரம்ப் மற்றும் புதின் கூட்டாக செய்தியாளர்களை சந்தித்தனர். அவர்களின் பின்னணியில் சமாதானத்தை தொடர்தல் என்று எழுதப்பட்டு இருந்தது. முதலில் புதினை பேசுமாறு டிரம்ப் சைகை காட்டினார். அதன் படி, தனது பேச்சை தொடங்கிய புதின், டிரம்ப் உடனான சந்திப்பு தாமதமாக நடந்த ஒன்று என்று குறிப்பிட்டார். போர் மூண்டதற்கான முதன்மை பிரச்னைக்கு தீர்வு காண வேண்டும் என்று புதின் தெரிவித்தார். அதாவது நாட்டோவில் உக்ரைன் இணைவது தொடர்பான பிரச்னைக்கு தீர்வு தேவை என்று புதின் வலியுறுத்தினார்.

பின்னர் பேசிய அமெரிக்க அதிபர் டிரம்ப், இந்த சந்திப்பு ஆக்கப்பூர்வமாக இருந்ததாக குறிப்பிட்டார். ஆனால், எந்த உடன்பாடும் எட்டப்படவில்லை என்று டிரம்ப் தெரிவித்தார். செய்தியாளர்கள் சந்திப்பு நிறைவடைவதற்கு முன்பு, மிக விரைவில் மீண்டும் சந்திப்போம் என்று டிரம்ப் கூறினார். அதற்கு, அடுத்த முறை மாஸ்கோவில் என்று புதின் ஆங்கிலத்தில் பதில் அளித்தார். இருவரும் சுமார் 10 நிமிடங்கள் செய்தியாளர்களை சந்தித்த நிலையில், எந்த கேள்விகளுக்கும் பதில் அளிக்காமல் அங்கிருந்து புறப்பட்டு சென்றனர். பின்னர் தனியார் ஊடகம் ஒன்றுக்கு பேட்டி அளித்த டிரம்ப், உடன்பாடிற்கு உக்ரைன் ஒத்துழைக்க வேண்டும் என்று வலியுறுத்தினார். மிகுந்த எதிர்பார்ப்புக்கு இடையே நடைபெற்ற புதின்-டிரம்ப் பேச்சுவார்த்தையில் எந்த முடிவும் எட்டப்படாத நிலையில், டிரம்ப்பின் அடுத்த கட்ட நகர்வு என்ன என்பதை பொறுத்திருந்து தான் பார்க்க வேண்டும்..