சீன பொறியாளர்கள் நாடு திரும்ப உத்தரவு : தமிழ்நாட்டில் ஐபோன் உற்பத்தியில் பாதிப்பு?

உலகளவில் ஐந்தில் ஒரு பங்கு ஆப்பிள் ஐபோன் இந்தியாவில் தயாரிக்கப்பட்டு வருகிறது. அடுத்தாண்டு இறுதிக்குள் அமெரிக்காவிற்கு ஏற்றுமதி செய்யப்படும் அனைத்து ஐபோன்களும் இந்தியாவில் இருந்து தயாரித்து அனுப்ப ஆப்பிள் நிறுவனம் திட்டமிட்டுள்ளது.

இந்தியாவில் தமிழ்நாடு உள்ளிட்ட இடங்களில் உள்ள ஆலைகளில் ஐபோன்கள் தயாரிக்கும் பணியை பாக்ஸ்கான் நிறுவனம் செயல்படுத்தி வருகிறது. இதில், சீனா மற்றும் தைவான் நாடுகளின் பொறியாளர்கள் அதிகளவில் பணிபுரிந்து வந்தனர்.

இந்நிலையில், இந்தியாவில் பாக்ஸ்கான் ஆலைகளில் பணிபுரியும் சீன பொறியாளர்களை உடனடியாக தாயகம் திரும்புபடி அந்நிறுவனம் அறிவுறுத்தியுள்ளது.

தங்கள் நாட்டின் தொழில்நுட்பம் மற்றும் திறன் வாய்ந்த தொழிலாளர்களை இந்தியாவிற்கு ஏற்றுமதி செய்யக் கூடாது என்று சீனா உத்தரவிட்டதன் அடிப்படையில் பாக்ஸ்கான் நிறுவனம் இந்த முடிவை எடுத்துள்ளதாகக் கூறப்படுகிறது.