Last Updated:
2025 WTA சீசனில் சென்னை ஓபன் மீண்டும் ஒதுக்கீடு செய்யப்பட்டிருப்பது பெரும் மகிழ்ச்சியை ஏற்படுத்தியுள்ளது.
உலக மகளிர் டென்னிஸ் தொடரான WTA 250, மூன்று வருட இடைவெளிக்குப் பிறகு மீண்டும் சென்னையில் நடைபெறுகிறது. இந்த வருடம் அக்டோபர் 7 முதல் நவம்பர் 2 இத்தொடர், நுங்கம்பாக்கத்தில் அமைந்துள்ள தமிழ்நாடு விளையாட்டு மேம்பாட்டு ஆணையத்தின் (SDAT) டென்னிஸ் மைதானத்தில் நடைபெற உள்ளது.
WTA அமைப்பின் அதிகாரப்பூர்வ அட்டவணையில் இடம்பெற்றுள்ள இந்த 250 புள்ளி கொண்ட போட்டியில், ஒற்றையர் பிரிவில் 32 வீராங்கனைகள் மற்றும் இரட்டையர் பிரிவில் 16 ஜோடிகள் பங்கேற்க உள்ளனர். இந்தியாவில் நடைபெறும் சில முக்கியமான டென்னிஸ் நிகழ்வுகளில் இதுவும் ஒன்றாகும்.
கடைசியாக 2022-ஆம் ஆண்டு சென்னையில் நடைபெற்ற இந்த தொடரில், செக் குடியரசைச் சேர்ந்த லிண்டா ஃப்ருஹ்விர்டோவா, ஒற்றையர் பட்டத்தை வென்றார். இரட்டையர் பிரிவில் கனடாவின் கேப்ரியலா டப்ரோவ்ஸ்கி மற்றும் பிரேசிலின் லூயிசா ஸ்டெஃபானி ஆகியோர் சாம்பியன்களாக பட்டம்பெற்றிருந்தனர். மூன்று ஆண்டுகள் கழித்து 2025 WTA சீசனில் சென்னை ஓபன் மீண்டும் ஒதுக்கீடு செய்யப்பட்டிருப்பது பெரும் மகிழ்ச்சியை ஏற்படுத்தியுள்ளது.
இந்த போட்டியின் மூலம், இந்திய வீராங்கனைகளுக்கும் சர்வதேச தரத்தில் விளையாடும் வாய்ப்பு கிடைக்கும் என்பது முக்கிய அம்சம். இதில் குறிப்பிடத்தக்கவர், இந்தியாவின் ஸ்ரீவள்ளி ராஷ்மிகா, 2025 ஆம் ஆண்டுக்கான ‘இதயங்களை கவர்ந்தவர்’ விருதை பில்லி ஜீன் கிங் கோப்பையில் பெற்றுள்ளார். இந்த விருது, சர்வதேச அரங்கில் வீராங்கனையின் அர்ப்பணிப்பு, ஆற்றல் மற்றும் தேசப்பற்று ஆகியவற்றை மதிக்கும் வகையில் வழங்கப்படுகிறது. இந்திய அணி, பில்லி ஜீன் கிங் கோப்பையின் ஆசிய/ஓசியானா பிரிவில் சிறப்பாக விளையாடி, ‘குரூப் 1’ பிரிவுக்கு முன்னேறியுள்ளதும் இந்திய டென்னிஸின் வளர்ச்சியின் மைல்கல்லாகும்.
June 20, 2025 11:45 AM IST
