மலேசிய இந்திய காங்கிரசின் (MIC) எட்டாவது தலைவராக இருந்த டத்தோ ஸ்ரீ ஜி. பழனிவேல் இன்று காலை ஜூன் 17, 2025 காலை 8 மணிக்கு குவாலாலம்பூர் மருத்துவமனையில் காலமானார். அவர் மார்ச் 1, 1949 ஆம் ஆண்டு பினாங்கில் பிறந்தவர். த அவருக்கு 76 வயதாகிறது.
அரசியலில் ஈடுபடுவதற்கு முன், பழனிவேல் ஒரு ஆராய்ச்சியாளராகவும், பத்திரிகையாளராகவும் தனது பணியை ஆரம்பித்தார். பின்னர், நீண்ட காலம் ம இ கா தலைவர் பதவியில் இருந்த துன் எஸ். சாமி வெலுவின் பத்திரிகை செயலாளராக நியமிக்கப்பட்டதன் மூலம் அவரது அரசியல் பயணம் தொடங்கியது. சாமி வேலுவின் விசுவாசமான சகாவாக இருந்தாலும், பழனிவேல் ஒரு நேர்மையான மற்றும் சுயாதீனக் குணம் கொண்டவராக இருந்தார்.
அவர் தனது அரசியல் வாழ்க்கையில் பல்வேறு அரசாங்கப் பொறுப்புகளை வகித்தார். துணை அமைச்சர், பிரதமர் துறையின் அமைச்சர், மற்றும் இயற்கை வளங்கள் மற்றும் சுற்றுச்சூழல் அமைச்சர் ஆகிய பதவிகளை வகித்தார். 2010ஆம் ஆண்டு MIC தலைவராக உயர்ந்தாலும், 2015ஆம் ஆண்டு கட்சியினுள் ஏற்பட்ட குழப்பங்கள் மற்றும் போட்டிகளால் அவரது தலைமை முடிவுக்கு வந்தது.நான் அவரை நன்கு அறிந்த ஒருவராக இருந்தேன். நான் மலேசிய தேசியப் பல்கலைக்கழகத்தில் (UKM) பேராசிரியராக இருந்த காலத்திலும் பின்னர் பினாங்கு மாநிலத்தின் துணை முதல்வராக (Deputy Chief Minister II) இருந்தபோதும் பழனிவேல் எனக்கு நெருக்கமான ஒரே ம இ கா தலைவர். சிலாங்கூரில் நிலத்துடன் கூடிய தொழிலாளர் வீடமைப்புத் திட்டங்களை விரைவுபடுத்துவதற்கான சில யோசனைகளை நான் அவரிடம் வழங்கியபோது, அவர் அதில் உண்மையான ஆர்வத்துடன் பதிலளித்தார்.
பினாங்கு மாநில அரசில் இருந்தபோது அவர் என்னை சந்தித்த நேரங்கள் இருந்தன. MIC வட்டாரங்களில் அவர் என்னை ஒரு நண்பனாக குறிப்பதாக எனக்கு கூறப்பட்டது. எனது MIC மீது இருந்த தொடர்ச்சியான விமர்சனங்களைப் பொருத்தவரை, இது சில MIC தலைவர்களுக்கு மகிழ்ச்சியைத் தராதிருந்திருக்கும்.
அவர் மஇகா தலைமை பதவியிலிருந்து விலகிய பிறகு நாங்கள் தொடர்பில் இல்லாமல் போனோம். 2024 ஆம் ஆண்டு மார்சில் தான், நீண்ட இடைவெளிக்குப் பிறகு, குவாலாலம்பூரில் உள்ள அவரது வீட்டில் அவரை சந்திக்க நேர்ந்தது. ஆனால் அவரது உடல்நலம் மிகவும் பாதிக்கப்பட்ட நிலையில் இருந்ததால், நாங்கள் அர்த்தமுள்ள உரையாடலை மேற்கொள்ள முடியவில்லை. அவரது மனைவி, கடைசி வரை மிகுந்த அக்கறையுடன் அவரைப் பராமரித்தார்.
பிற ம இ கா தலைவர்களுடன் எனக்கு நெருக்கம் இல்லாவிட்டாலும், பழனிவேலை நான் மிகுந்த மதிப்புடன் பார்த்தேன். அவர் ஒரு கனிவான, கருணையுள்ள நபராக இருந்தார். கட்சி அரசியலில் உள்ள உள்நட்பு அரசியலும், வர்த்தக உறவுகளும் அவருக்கு எப்போதும் ஒரு சவாலான விஷயமாகவே இருந்தன. அதிகாரத்திற்காக தனது நெறிமுறைகளை தளர்த்த மறுத்த அதே நேர்மைதான் அவரது அரசியல் வாழ்க்கையை விரைவில் முடிவுக்கு கொண்டு வந்ததோ என நினைக்கத் தோன்றுகிறது.
முன்னாள் பிரதமர் நஜிப் ரசாக் அவரை அமைச்சரவையிலிருந்து நீக்கியது மற்றும் அவரது எதிரியை ஆதரித்தது MIC கட்சியின் பலவீனத்திற்கு வழிவகுத்தது. ம இ கா வின் வீழ்ச்சியின் தொடக்கமே பழனிவேலை ஒதுக்கிய தருணத்திலிருந்தே ஆரம்பமானது. இன்று அந்த கட்சி ஒரு அமைச்சரையும் தர முடியாத நிலையைக் கொண்டுள்ளது.
டத்தோ’ ஸ்ரீ ஜி. பழனிவேல் இப்போது நம்முடன் இல்லையென்றாலும், அவர் என்னுடன் பகிர்ந்த உரையாடல்கள் மற்றும் இந்திய சமூகத்திற்கு பணியாற்ற விரும்பிய அவரின் உண்மையான விருப்பத்தை நினைவில் வைத்துக் கொள்வேன். ம இ கா வழங்கிய சில நேர்மையான, பொக்கிஷமான தலைவர்களில் ஒருவர் அவர். குழப்பங்களின் மத்தியில் கூட தன்னுடைய நிலைப்பாட்டை உறுதியாக காத்த ஒரு தலைவர்.
அவருடைய ஆன்மா சாந்தியடையட்டும்.
