ஹைதராபாத்: ஐபிஎல் டி20 கிரிக்கெட் தொடரில் சன்ரைசர்ஸ் ஹைதராபாத் அணிக்கு எதிரான தனது இன்னிங்ஸில் 5 விக்கெட்டுகளை இழந்த சென்னை சூப்பர் கிங்ஸ் அணி 165 ரன்களைச் சேர்த்துள்ளது.
ஹைதராபாத்தில் உள்ள ராஜீவ்காந்தி சர்வதேச மைதானத்தில் நடைபெற்று வரும் இந்தப் போட்டியில் டாஸ் வென்ற ஹைதராபாத் பந்துவீச்சை தேர்வு செய்தது. அதன்படி ருதுராஜ் கெய்க்வாட் – ரச்சின் ரவீந்திரா இணை சிஎஸ்கேவின் ஓப்பனர்களாக களமிறங்கினர்.
புவனேஷ்வர் குமார் வீசிய 4-வது ஓவரில் கேட்ச் கொடுத்து 12 ரன்களில் விக்கெட்டானார் ரச்சின். நிதான ஆட்டத்தை வெளிப்படுத்திக் கொண்டிருந்த ருதுராஜ் 8வது ஓவரில் 26 ரன்களுடன் அவுட்டானார். 10 ஓவர் முடிவில் 2 விக்கெட்டுகளை இழந்த சிஎஸ்கே 84 ரன்களை சேர்த்திருந்தது.
அஜிங்க்ய ரஹானே – ஷிவம் துபே இணை ரன்களை ஏற்றும் முனைப்பில் இறங்கினர். துபே 4 சிக்சர்களை விளாசி அதிரடி காட்டினார். பாட் கம்மின்ஸ் வீசிய 14வது ஓவரில் கேட்ச் கொடுத்து 45 ரன்களில் வெளியேறினார் துபே. அரைசதம் மிஸ்ஸிங்!
அவரைத் தொடர்ந்து ரஹானேவும் 35 ரன்களில் கிளம்பினார். 15 ஓவர் முடிவில் 4 விக்கெட்டுகளை இழந்த சென்னை அணி 127 ரன்களைச் சேர்த்திருந்தது. ரவீந்திர ஜடேஜா – டேரில் மிட்செல் பொறுப்பான ஆடினாலும், நடராஜன் வீசிய பந்தில் கடைசி ஓவரில் 13 ரன்களில் அவுட்டானார் மிட்செல்.
இறுதியாக வந்த தோனி 1 ரன்னும், ரவீந்திர ஜடேஜா 31 ரன்களுடன் களத்தில் இருக்க, நிர்ணயிக்கப்பட்ட 20 ஓவர்கள் முடிவில் 5 விக்கெட்டுகளை இழந்த சிஎஸ்கே 165 ரன்களை சேர்த்தது.
ஹைதராபாத் அணி தரப்பில் புவனேஷ்வர் குமார், பாட் கம்மின்ஸ், ஜெயதேவ் உனத்கட், ஷஹபாஸ் அகமது, நடராஜன் ஆகியோர் தலா ஒரு விக்கெட்டை வீழ்த்தினர்.
&w=1200&resize=1200,675&ssl=1)
