புதுச்சேரி: பிரெஞ்சு பண்பாட்டின் தாக்கம் கொண்ட புதுவையில், ஆண்டு முழுவதும் அனைத்து மொழிகளின் படங்கள், விளம்பரங்களின் படப்பிடிப்புகள் நடத்தப்படுகின்றன.
இந்தப் படப்பிடிப்புகளில் பங்கேற்கும் சினிமா நட்சத்திரங்களுக்காக சொகுசு வசதிகள் கொண்ட கேரவன்கள் கொண்டு வரப்படுகின்றன. இந்த கேரவன்கள் மற்றும் சுற்றுலா பயணிகள் வரும் சொகுசு கேம்பர் வேன்களை தனி சாலை வரி கட்டமைப்பில் கொண்டுவந்து புதுவை போக்குவரத்து துறை வரி விதித்துள்ளது.
பொது சேவை, ஒப்பந்தம், போக்குவரத்து என்ற அடிப்படையில் இயக்கப்படும் கேரவன், கேம்பர் வேன்கள் (கேரவனில் இருக்கும் அனைத்து வசதிகளும் இதில் இருக்கும்) அனைத்தும் இந்த சாலை வரி கட்டமைப்பின் கீழ் கொண்டு வரப்பட்டுள்ளன. புதுவை மாநிலத்தில் பதிவு செய்யப்பட்ட இலகு மற்றும் நடுத்தர ரக கேரவன், கேம்பர் வாகனங்களுக்கு ஆண்டு வரியாக ரூ.32 ஆயிரம், கனரக வாகனங்களுக்கு ஆண்டு வரியாக ரூ.48 ஆயிரம் நிர்ணயிக்கப்பட்டுள்ளது.
தமிழகம் உட்பட பிற மாநிலங்களில் இருந்து வரும் கேரவன், கேம்பர் வேன்கள் தற்காலிக வரி கட்ட வேண்டும். இலகு, நடுத்தர கேரவன், கேம்பர் வேன்கள் 3 நாட்கள் சினிமா, விளம்பர சூட்டிங் எடுக்க ரூ.860, கனரக வாகனங்கள் ரூ.1,340 சாலை வரி செலுத்தி அனுமதி பெற வேண்டும்.
7 நாட்களுக்கு இலகு நடுத்தர ரக வாகனங்களுக்கு ரூ.1,800, கனரக வாகனங்களுக்கு ரூ.2,800 எனவும், 30 நாட்களுக்கு இலகு, நடுத்தர ரக வாகனங்களுக்கு ரூ.4,200, கனரக வாகனங்களுக்கு ரூ.8,800 எனவும் வரி செலுத்த வேண்டும் என மோட்டார் வாகன சட்டத்தில் திருத்தங்கள் கொண்டு வரப்பட்டுள்ளது.
