பாரிஸ்: பிரெஞ்சு ஓபன் டென்னிஸ் தொடர் பிரான்ஸ் நாட்டின் பாரிஸ் நகரில் நடைபெற்று வருகிறது. இதில் நேற்று முன்தினம் இரவு நடைபெற்ற ஆடவர் ஒற்றையர் பிரிவு அரை இறுதி ஆட்டத்தில் உலகின் முதல் நிலை வீரரான இத்தாலியின் ஜன்னிக் சின்னர், 6-ம் நிலை வீரரும் 24 முறை கிராண்ட் ஸ்லாம் பட்டம் வென்றுள்ள செர்பியாவின் நோவக் ஜோகோவிச்சுடன் மோதினார்.
3 மணி நேரம் 16 நிமிடங்கள் நடைபெற்ற இந்த ஆட்டத்தில் ஜன்னிக் சின்னர் 6-4 7-5 7-6(3) என்ற நேர் செட் கணக்கில் வெற்றி பெற்று இறுதிப் போட்டிக்கு முன்னேறினார். பிரெஞ்சு ஓபன் தொடரின் ஓபன் எராவில் (1968-ம் ஆண்டுக்கு பிறகு) இறுதிப் போட்டிக்கு முன்னேறிய 2-வது இத்தாலி வீரர் என்ற பெருமையை பெற்றுள்ளார் ஜன்னிக் சின்னர். இதற்கு முன்னர் 1976-ம் ஆண்டு பிரெஞ்சு ஓபன் தொடரில் இத்தாலியின் அட்ரியானோ பனாட்டா சாம்பியன் பட்டம் வென்றிருந்தார்.
இன்று நடைபெறும் இறுதிப் போட்டியில் ஜன்னிக் சின்னர், நடப்பு சாம்பியனும் 2-ம் நிலை வீரருமான ஸ்பெயினின் கார்லோஸ் அல்கராஸுடன் பலப்பரீட்சை நடத்துகிறார். இருவரும் 11 முறை நேருக்கு நேர் மோதி உள்ளனர்.
இதில் அல்கராஸ் 7 முறை வெற்றி கண்டுள்ளார். ஜன்னிக் சின்னர் 4 ஆட்டங்களில் வெற்றியை வசப்படுத்தியிருந்தார். அல்கராஸ் 5-வது முறையாக கிராண்ட் ஸ்லாம் பட்டத்தை வெல்லும் முனைப்பில் களமிறங்குகிறார். அதேவேளையில் ஜன்னிக் சின்னர் 4-வது பட்டத்துக்கு குறிவைத்துள்ளார்.
