புதுடெல்லி: கடந்த 2024-25 நிதியாண்டில் இந்தியாவின் மொத்த உள்நாட்டு உற்பத்தி (ஜிடிபி) 6.5% ஆக சரிந்துள்ளது. இது, முந்தைய 2023-24 நிதியாண்டில் 9.2% ஆக இருந்தது. கரோனா பெருந்தொற்று காலத்துக்குப் பிறகு, அதாவது கடந்த 4 ஆண்டுகளில் இல்லாத வீழ்ச்சி இது. அதேவேளையில், 2024-25 நிதியாண்டின் இறுதி காலாண்டின் ஜிடிபி வளர்ச்சி 7.4% ஆக இருந்தது ஓரளவு சாதகமாகப் பார்க்கப்படுகிறது.
புள்ளியியல் மற்றும் திட்ட அமலாக்க அமைச்சகத்தின் கீழ் இயங்கும் தேசிய புள்ளியியல் அலுவலகம், 2024–25 நிதியாண்டிற்கான வருடாந்திர மொத்த உள்நாட்டு உற்பத்தியின் தற்காலிக மதிப்பீடுகளையும், அதே ஆண்டின் ஜனவரி – மார்ச் காலாண்டுக்கான காலாண்டு மதிப்பீடுகளையும் வெளியிட்டுள்ளது. அதன்படி, கடந்த 2024-25 நிதியாண்டில் இந்தியாவின் மொத்த உள்நாட்டு உற்பத்தி (ஜிடிபி) 6.5% ஆக உள்ளது. இது, முந்தைய 2023-24 நிதியாண்டில் 9.2% ஆக இருந்தது கவனிக்கத்தக்கது.
2024-25-ஆம் நிதியாண்டின் 4-ஆம் காலாண்டில் உண்மையான ஜிடிபி வளர்ச்சி 7.4% ஆக அதிகரித்துள்ளது. இது ஆண்டின் மிக வேகமான காலாண்டு வளர்ச்சியாகும். 3-ஆம் காலாண்டின் ஜிடிபி வளர்ச்சி 6.4% ஆக இருந்தது. இருப்பினும், 2024-25-ஆம் ஆண்டின் 4-ஆம் காலாண்டின் வளர்ச்சி, முந்தைய நிதியாண்டின் நான்காவது காலாண்டில் காணப்பட்ட 8.4%-ஐ விட குறைவாகும்.
வேளாண்மை, கால்நடைகள், மீன்பிடித்தல் துறை நான்காவது காலாண்டில் 5.4% வளர்ச்சியடைந்தது. இது 2023-24-ஆம் ஆண்டின் நான்காவது காலாண்டில் 0.9% ஆக இருந்தது. உற்பத்தித் துறையின் வளர்ச்சி 2024-25 நிதியாண்டின் நான்காவது காலாண்டில் 4.8% ஆக இருந்தது. இது ஆண்டின் இரண்டாவது வேகமான காலாண்டு வளர்ச்சியாகும். இது முந்தைய ஆண்டின் நான்காவது காலாண்டில் 11.3% என்ற அளவில் அதிகமாக இருந்தது.
நான்காவது காலாண்டில் கட்டுமானத் துறை இரட்டை இலக்க வளர்ச்சியை 10.8% ஆக மீண்டும் எட்டியுள்ளது. இது இந்த ஆண்டின் வேகமான வளர்ச்சியாகும். மேலும், 2023-24 ஆம் ஆண்டின் 4-ஆம் காலாண்டில் காணப்பட்ட 8.7% ஐ விட இது அதிகம். இந்தியாவின் உண்மையான ஜிடிபி 2024-25 நிதியாண்டில் ரூ. 187.97 லட்சம் கோடியை எட்டியுள்ளதாக மதிப்பிடப்பட்டுள்ளது. இது 2023–24-ல் ரூ.176.51 லட்சம் கோடியாக இருந்தது.
- கடந்த 5 நிதியாண்டுகளின் ஜிடிபி வளர்ச்சி விகிதம் வருமாறு:
- 2020-21: -5.8%
- 2021-22: 9.7%
- 2022-23: 7.6%
- 2023-24: 9.2%
- 2024-25: 6.5%
