சென்னை: ஐபிஎல் டி20 கிரிக்கெட் தொடரில் இன்று பிற்பகல் 3.30 மணிக்கு சென்னை சேப்பாக்கம் எம்.ஏ.சிதம்பரம் மைதானத்தில் நடைபெறும் ஆட்டத்தில் தடுமாறி வரும் சென்னை சூப்பர் கிங்ஸ், புத்துயிர் பெற்றுள்ள டெல்லி கேப்பிடல்ஸ் அணியுடன் மோதுகிறது.
5 முறை சாம்பியனான சிஎஸ்கே இம்முறை தொடக்கத்திலேயே தடுமாற்றத்தை சந்தித்துள்ளது. முதல் ஆட்டத்தில் மும்பையை வீழ்த்திய நிலையில் அடுத்த இரு ஆட்டங்களிலும் முறையே பெங்களூரு, ராஜஸ்தானிடம் தோல்வி கண்டிருந்தது. அதேவேளையில் டெல்லி கேப்பிடல்ஸ் பேட்டிங்கில் பலம் வாய்ந்த சன்ரைசர்ஸ் ஹைதராபாத், லக்னோ சூப்பர் ஜெயண்ட்ஸ் அணிகளை வீழ்த்தி ஹாட்ரிக் வெற்றியை நோக்கி களமிறங்குகிறது. இன்றைய ஆட்டத்தில் ரிஸ்ட் ஸ்பின்னர்களான நூர் அகமது, குல்தீப் யாதவ் ஆகியோர் மீது அதிக எதிர்பார்ப்பு உள்ளது.
ஏனெனில் உலர்ந்த மற்றும் சுழற்பந்து வீச்சுக்கு சாதகமான ஆடுகளத்துடன் பிற்பகலில் போட்டி நடைபெறுவதால் இவர்கள் இருவருமே தாக்கத்தை ஏற்படுத்தக்கூடும். டெல்லி கேப்பிடல்ஸ் அணியின் குல்தீப் யாதவ் நடப்பு சீசனில் ஓவருக்கு சராசரியாக 5.25 ரன்களை மட்டுமே விட்டுக்கொடுத்து எதிரணியின் ரன் குவிப்பை கட்டுப்படுத்தியதில் முக்கிய பங்கு வகித்துள்ளார். அவர், சென்னை அணியின் நடுவரிசை பேட்டிங்குக்கு சவால் அளிக்கக்கூடும்.
அதேவேளையில் சிஎஸ்கேவின் நூர் அகமது ஓவருக்கு சராசரியாக 6.83 ரன்களை வழங்கிய நிலையில் 9 விக்கெட்களை வீழ்த்தியுள்ளார். நடுஓவர்களில் அவர், பேட்ஸ்மேன்களுக்கு நெருக்கடி கொடுப்பதில் அபாயகரமான வீரராக திகழ்ந்து வருகிறார். இவர்களது இருவரின் பந்துவீச்சு பாணியும் வேறுபட்டவை, அதிலும் புதிரானதும் கூட. குல்தீப் யாதவ் ஃபிளைட், லென்ந்த், கை வேகத்தில் ஏற்படும் மாற்றங்களை நம்பியுள்ளார். அதே நேரத்தில் நூர் அகமது பிளாட்டாகவும், வேகமாகவும் பந்து வீசுகிறார். வலது கை பேட்ஸ்மேன்களுக்கு எதிராக பந்தை அதிகம் திருப்புகிறார். இதனால் இவர்கள் இருவருமே களத்தில் நிலவும் சூழ்நிலைகள் சாதகமாக இருக்கும் பட்சத்தில் எதிரணியின் மிடில் ஆர்டரை கட்டுப்படுத்துவதில் முக்கியமானவர்களாக திகழக்கூடும். அதேவேளையில் வேகப்பந்து வீச்சில் கடந்த ஆட்டத்தில் 5 விக்கெட்களை வீழ்த்திய மிட்செல் ஸ்டார்க் நெருக்கடி கொடுக்கக்கூடும்.
பேட்டிங்கை பொறுத்தவரையில் டெல்லி அணியில் டு பிளெஸ்ஸிஸ், ஜேக் பிரேசர் மெக்கர்க், கே.எல்.ராகுல், அபிஷேக் போரெல், டிரிஸ்டன் ஸ்டப்ஸ் ஆகியோர் அதிரடியாக விளையாடும் திறன் கொண்டவர்கள். பின் வரிசையில் அஷுதோஷ் சர்மா, அக்சர் படேல், விப்ராஜ் நிகாம் ஆகியோர் கைகொடுக்கக்கூடியவர்கள். இதில் அஷுதோஷ் சர்மா, லக்னோ அணிக்கு எதிரான ஆட்டத்தில் 31 பந்துகளில், 66 ரன்கள் விளாசி அணியின் வெற்றிக்கு முக்கிய பங்களிப்பு செய்திருந்தார். மேலும் டு பிளெஸ்ஸிஸ் கடந்த காலங்களில் சிஎஸ்கேவுக்காக விளையாடி உள்ளதால் அவர், தனது அனுபவத்தால் அணியில் உள்ள இளம் பேட்ஸ்மேன்களை வழிநடத்தக்கூடும். ஒட்டுமொத்தமாக சிஎஸ்கேவுடன் ஒப்பிடுகையில் டெல்லி அணியின் டாப் ஆர்டர், நடுவரிசை, பின்வரிசை பேட்டிங் பலமாகவே காணப்படுகிறது.
சிஎஸ்கேவின் பேட்டிங் தொடக்கத்திலும் சரி, இறுதியிலும் சரி உத்வேகம் இல்லாமல் உள்ளது. கடந்த சீசன்களில் ஆக்ரோஷம் காட்டிய ஷிவம் துபே பார்மின்றி தவித்து வருகிறார். ருதுராஜ் கெய்க்வாட் 3-வது வீரராக களமிறங்குவதும் பாதகமான நிலையை உருவாக்கி உள்ளது. தொடக்க வீரரான ராகுல் திரிபாதி வேகப்பந்து வீச்சுக்கு எதிராக தடுமாறுவது வாடிக்கையாக உள்ளது. மற்றொரு தொடக்க வீரரான ரச்சின் ரவீந்திரா மந்தமாக விளையாடுவதும் அணியின் பலவீனத்தை அதிகரிக்கச் செய்துள்ளது.
நடுவரிசையில் தீபக் ஹூடா, சாம் கரண் ஆகியோருக்கு பதிலாக கடந்த ஆட்டத்தில் களமிறக்கப்பட்ட விஜய் சங்கர், ஜேமி ஓவர்டன் ஆகியோரிடம் இருந்தும் தாக்கத்தை ஏற்படுத்தக்கூடிய அளவிலான மட்டை வீச்சு வெளிப்படவில்லை. இதேபோன்று பின்வரிசையில் முக்கியமான கட்டங்களில் தாக்குதல் ஆட்டம் தொடுக்கும் ரவீந்திர ஜடேஜா, தோனி ஆகியோரிடம் இருந்து நடப்பு சீசனில் ரன் வறட்சி நிலவுவது அணியின் ஒட்டுமொத்த பேட்டிங் வரிசையையும் பலவீனப்படுத்தி உள்ளது.
இதேபோன்று பந்து வீச்சில் நூர் அகமது, கலீல் அகமது ஆகியோரை தவிர மற்ற வீரர்கள் எதிரணியின் ரன் குவிப்பை கட்டுப்படுத்துவதில் தேக்கம் அடைகின்றனர். ஜடேஜா, அஸ்வின், பதிரனா ஆகியோரிடம் இருந்து திருப்பு முனையை ஏற்படுத்தக்கூடிய அளவிலான செயல் திறன் வெளிப்படவில்லை.
இதில் அஸ்வின் பவர்பிளேவில் அதிக ரன்களை வாரி வழங்குவது பலவீனமாக உள்ளது. இதனால் சிஎஸ்கே அணி வெற்றிப் பாதைக்கு திரும்ப வேண்டுமென்றால் அணிச் சேர்க்கையை மாற்றி அமைக்க வேண்டிய கட்டாயத்தில் உள்ளது. அநேமாக இன்றைய ஆட்டத்தில் டாப் ஆர்டரில் டேவன் கான்வே களமிறக்கப்படக்கூடும்.
சேப்பாக்கில் எப்படி? – சேப்பாக்கம் மைதானத்தில் சிஎஸ்கே – டெல்லி கேப்பிடல்ஸ் அணிகள் இதுவரை 9 ஆட்டங்களில் விளையாடி உள்ளன. இதில் சிஎஸ்கே 7 ஆட்டங்களில் வெற்றி பெற்றுள்ளது. எனினும் தற்போதைய டெல்லி அணி கெவின் பீட்டர்சனின் ஆலோசனையாலும் அக்சர் படேலின் கேப்டன்சியாலும் முன்னெப்போதையும் விட சமநிலையுடனும் ஆற்றலுடனும் இருப்பதாகத் தெரிகிறது.
