மும்பை: வங்கிகளின் குறுகிய கால கடனுக்கான ரெப்போ வட்டி விகிதம் 6% ஆக குறைக்கப்பட்டுள்ளது. இதன்மூலம் வீடு, வாகனக் கடன்களுக்கான வட்டி விகிதம் குறைய வாய்ப்பு ஏற்பட்டுள்ளது.
ரெப்போ விகிதம் என்பது வங்கிகளுக்கு ரிசர்வ் வங்கி வழங்கும் கடனுக்கு விதிக்கப்படும் வட்டி விகிதமாகும். ரெப்போ விகிதம் கடந்த 5 ஆண்டுகளாக 6.50% ஆக இருந்த நிலையில், கடந்த பிப்ரவரி 7ம் தேதி 0.25% குறைக்கப்பட்டு, 6.25% ஆக இருந்தது.
இந்நிலையில், இரண்டு மாதங்களில் அது மேலும் 25 அடிப்படை புள்ளிகள் குறைக்கப்பட்டு 6% ஆக மாற்றப்பட்டுள்ளது. ரிசர்வ் வங்கியின் நிதிக் கொள்கைக் குழு ஆலோசனைக் கூட்டத்தில் இந்த முடிவு ஒருமனதாக எடுக்கப்பட்டதாக அறிவிக்கப்பட்டுள்ளது. இதன்மூலம் ரிசர்வ் வங்கி தனது நிலைப்பாட்டை ‘நடுநிலை’ என்பதிலிருந்து ‘இணக்கம்’ என்ற நிலைக்கு மாற்றியுள்ளது.
2025-26 ஆம் நிதியாண்டுக்கான உண்மையான மொத்த உள்நாட்டு உற்பத்தி 6.5% ஆக இருக்கும் எனக் கணிக்கப்பட்டுள்ளது, அதே நேரத்தில் அதே நிதியாண்டுக்கான நுகர்வோர் விலைக் குறியீட்டு (CPI) பணவீக்கம் 4% ஆகக் கணிக்கப்பட்டுள்ளது.
ரிசர்வ் வங்கி ஆளுநர் சஞ்சய் மல்ஹோத்ரா நடப்பு நிதியாண்டின் முதல் இருமாத பணவியல் கொள்கையில் இந்த அறிவிப்புகளை வெளியிட்டார். இதைத் தொடர்ந்து மதியம் 12:00 மணிக்கு செய்தியாளர் சந்திப்பு நடைபெறும். அதில் செய்தியாளர்களின் கேள்விகளுக்கு ரிசர்வ் வங்கி ஆளுநர் பதிலளிக்க உள்ளார்.
அமெரிக்க அதிபர் டொனால்ட் ட்ரம்பின் பரஸ்பர கட்டணங்கள் அமலுக்கு வரும் நாளில், ரிசர்வ் வங்கியின் நிதிக் கொள்கைக் குழுவின் முடிவு அறிவிக்கப்பட்டுள்ளது குறிப்பிடத்தக்கது.
