உயர் நீதிமன்ற நீதிபதிகளில் 77 சதவிகிதம் பேர் உயர் சாதியினர்.. மத்திய அரசு வெளியிட்ட தரவு!

மாநிலங்களவையில் பேசிய ராஷ்ட்ரிய ஜனதா தளம் கட்சி உறுப்பினர் மனோஜ் குமார், உயர் நீதிமன்றம் மற்றும் உச்ச நீதிமன்றங்களில், இடஒதுக்கீடு பிரிவினர் எவ்வளவு பேர் உள்ளனர் என கேள்வி எழுப்பியிருந்தார். இதற்கு எழுத்து மூலம் பதில் அளித்துள்ள சட்டத் துறை அமைச்சர் அர்ஜூன் ராம் மேக்வால், 2018-ஆம் ஆண்டு முதல் உயர் நீதிமன்றங்களில் 715 பேர் நீதிபதிகளாக நியமிக்கப்பட்டுள்ளதாக தெரிவித்துள்ளார்.

அதில், 22 பேர் தாழ்த்தப்பட்ட வகுப்பினர் என்றும், 16 பேர் பழங்குடியினர் என்றும், 89 பேர் இதர பிற்படுத்தப்பட்ட வகுப்பைச் சேர்ந்தவர்கள் என்றும், 37 பேர் சிறுபான்மையினர் எனவும் கூறியுள்ளார். அதேநேரத்தில், உயர் சாதியினர் 551 பேர் உயர் நீதிமன்ற நீதிபதிகளாக நியமிக்கப்பட்டுள்ளதாகவும் தெரிவித்துள்ளார். இது 77.06 சதவிகிதமாகும்.

Also Read | Gold Rate: மீண்டும் ரூ.66,000-த்தை நெருங்கும் தங்கம் விலை..! இன்றைய ரேட் என்ன தெரியுமா..?

மேலும், உயர் நீதிமன்றங்களில் நீதிபதி பணியிடங்களுக்கு பரிந்துரை அளிக்கும் போது, இடஒதுக்கீடு பிரிவினர் மற்றும் சிறுபான்மையினர் குறித்து உரிய பரிசீலனை செய்ய வேண்டும் என உயர் நீதிமன்ற தலைமை நீதிபதிகளை கேட்டுக் கொண்டுள்ளதாகவும் அமைச்சர் அர்ஜுன் ராம் மேக்வால் கூறியுள்ளார்.