கொல்கத்தா: ஐபிஎல் டி20 கிரிக்கெட் திருவிழாவின் 18-வது சீசன் போட்டிகள் கொல்கத்தா ஈடன் கார்டன் மைதானத்தில் கண்கவர் கலை நிகழ்ச்சிகளுடன் இன்று தொடங்குகிறது.
ஐபிஎல் டி20 கிரிக்கெட் திருவிழாவின் 18-வது சீசன் போட்டிகள் கொல்கத்தா ஈடன் கார்டன் மைதானத்தில் கண்கவர் கலை நிகழ்ச்சிகளுடன் இன்று தொடங்குகிறது. மே 25-ம் தேதி வரை நடைபெறும் இந்த கிரிக்கெட் திருவிழாவில் தலா 5 முறை சாம்பியன்களான சென்னை சூப்பர் கிங்ஸ், மும்பை இந்தியன்ஸ், 3 முறை சாம்பியனான கொல்கத்தா நைட் ரைடர்ஸ், 2008-ல் பட்டம் வென்ற ராஜஸ்தான் ராயல்ஸ், 2016-ல் வாகை சூடிய சன்ரைசர்ஸ் ஹைதராபாத், 2022-ல் கோப்பையை வென்ற குஜராத் டைட்டன்ஸ் ஆகிய அணிகளுடன் 17 சீசன்களாக பட்டம் வெல்ல முடியாமல் போராடும் ராயல் சாலஞ்சர்ஸ் பெங்களூரு, பஞ்சாப் கிங்ஸ் அணிகளும் மற்றும் 3 ஆண்டுகளுக்கு முன்னர் அறிமுகமாகி 2 முறை பிளே ஆஃப் சுற்றில் கால்பதித்த லக்னோ சூப்பர் ஜெயண்ட்ஸ் அணியும் பட்டம் வெல்வதற்காக மல்லுக்கட்ட உள்ளன.
தொடக்க ஆட்டத்தில் இன்று இரவு 7.30 மணிக்கு கொல்கத்தா ஈடன் கார்டன் மைதானத்தில் நடப்பு சாம்பியனான கொல்கத்தா நைட் ரைடர்ஸ், ராயல் சாலஞ்சர்ஸ் பெங்களூரு அணியுடன் மோதுகிறது. இரு அணிகளுமே புதிய கேப்டனின் தலைமையில் களமிறங்குகின்றன. கடந்த சீசனில் கொல்கத்தா அணியின் கேப்டனாக இருந்த ஸ்ரேயஸ் ஐயர் இம்முறை பஞ்சாப் அணிக்கு சென்றுள்ளார். இதனால் கொல்கத்தா அணி அஜிங்க்ய ரஹானே தலைமையில் விளையாட உள்ளது. அதேவேளையில் பெங்களூரு அணி இதுவரை சர்வதேச டி20 கிரிக்கெட்டில் அறிமுகமாகாத ரஜத் பட்டிதார் தலைமையில் களமிறங்குகிறது.
கொல்கத்தா அணியின் பேட்டிங்கில் டாப் ஆர்டரில் சுனில் நரேன், குயிண்டன் டி காக், அஜிங்க்ய ரஹானே, வெங்கடேஷ் ஐயர், ரஹ் மனுல்லா குர்பாஸ் பலம் சேர்க்கக்கூடும். நடுவரிசையில் மணீஷ் பாண்டே, ரோவ்மன் பாவெல், அங்க்கிரிஷ் ரகுவன்ஷி நம்பிக்கை அளிக்கக்கூடியவர்கள் பின்வரிசையில் ஆந்த்ரே ரஸ்ஸல், ரிங்கு சிங் ஆகியோரின் தாக்குதல் ஆட்டம் பலம் சேர்க்கக்கூடும்.
பந்துவீச்சில் புதிர் சுழற்பந்து வீச்சாளர்ளான வருண் சக்ரவர்த்தி, சுனில் நரேன் எதிரணியின் பேட்ஸ்மேன்களுக்கு சவால்தரக்கூடும். இவர்களுடன் மொயின் அலியும் பலம் சேர்க்கக்கூடும். வேகப்பந்துவீச்சில் அன்ரிச் நோர்க்கியா, ஹர்ஷித் ராணா, ஸ்பென்சர் ஜான்சன், உம்ரான் மாலிக் நம்பிக்கை அளிக்கக்கூடும்.
பெங்களூரு அணியில் டாப் ஆர்டரில் பில் சால்ட், விராட் கோலி ஜோடி பவர்பிளேவில் முக்கிய பங்குவகிக்கக்கூடும். டிம் டேவிட், தேவ்தத் படிக்கல், ஜிதேஷ் ஷர்மா, லியாம் லிவிங்ஸ்டன் ஆகியோரும் உறுதுணையாக செயல்படக்கூடும். வேகப்பந்து வீச்சில் ஜோஷ் ஹேசில்வுட், புவனேஷ்வர் குமார், யாஷ் தயாள், ரொமாரியோ ஷெப்பர்ட், லுங்கி நிகிடி ஆகியோர் சவால்தரக்கூடும். சுழலில் ஜேக்கப் பெத்தேல், கிருணல் பாண்டியா, சுயாஷ் சர்மா பலம் சேர்க்கக்கூடும்.
போட்டி தொடங்குவதற்கு முன்னதாக 6 மணி அளவில் கண்கவர் தொடக்க விழா நடைபெறுகிறது. இதில் பாலிவுட் நடிகை திஷா பட்டானியின் நடனம் இடம் பெறுகிறது. ஸ்ரேயா கோஷல், கரன் அஜூலா ஆகியோர் பல்வேறு பாடல்களை பாடி ரசிகர்களை மகிழ்விக்க உள்ளனர்.
இதற்கிடையே போட்டியின் போது மழை குறுக்கீடு இருக்கக்கூடும் என வானிலை மையம் தெரிவித்துள்ளது.
