டுனிடின்: நியூஸிலாந்து – பாகிஸ்தான் அணிகள் இடையிலான 2-வது டி 20 கிரிக்கெட் போட்டி நேற்று டுனிடின் நகரில் நடைபெற்றது. மழை காரணமாக 15 ஓவர்களை கொண்டதாக நடத்தப்பட்ட இந்த ஆட்டத்தில் முதலில் பேட் செய்த பாகிஸ்தான் அணி 9 விக்கெட்கள் இழப்புக்கு 135 ரன்கள எடுத்தது. அதிகபட்சமாக கேப்டன் சல்மான் ஆகா 28 பந்துகளில், 3 சிக்ஸர்கள், 4 பவுண்டரிகளுடன் 46 ரன்களும், ஷதப் கான் 14 பந்துகளில், 2 சிக்ஸர்கள், 2 பவுண்டரிகளுடன் 26 ரன்களும் சேர்த்தனர். நியூஸிலாந்து அணி தரப்பில் ஜேக்கப் டஃபி, பென் சியர்ஸ்,ஜேம்ஸ் நீஷாம், இஷ் சோதி ஆகியோர் தலா 2 விக்கெட்களை வீழ்த்தினர். 136 ரன்கள் இலக்குடன் பேட் செய்த நியூஸிலாந்து அணி 13.1 ஓவர்களில் 5 விக்கெட்கள் இழப்புக்கு 137 ரன்கள் எடுத்து வெற்றி பெற்றது. டிம் ஷெய்பர்ட் 22 பந்துகளில், 5 சிக்ஸர்கள், 3 பவுண்டரிகளுடன் 45 ரன்களும், ஃபின் ஆலன் 16 பந்துகளில், 5 சிக்ஸர்கள், ஒரு பவுண்டரியுடன் 38 ரன்களும் விளாசினர்.
முகமது அலி வீசிய 2-வது ஓவரில் ஃபின் ஆலன் 3 சிக்ஸர்களையும், ஷாகின் ஷா அப்ரிடி வீசிய அடுத்த ஓவரில் டிம் ஷெய்பர்ட் 4 சிக்ஸர்களையும் பறக்கவிட்டு மிரளச் செய்தனர். 5 விக்கெட்கள் வித்தியாசத்தில் வெற்றி பெற்ற நியூஸிலாந்து அணி 5 ஆட்டங்கள் கொண்ட டி 20 கிரிக்கெட் தொடரில் 2-0 என முன்னிலை வகிக்கிறது. கிறைஸ்ட்சர்ச்சில் நடைபெற்ற முதல் போட்டியில் நியூஸிலாந்து அணி 9 விக்கெட்கள் வித்தியாசத்தில் வெற்றி பெற்றிருந்தது. 3-வது ஆட்டம் ஆக்லாந்தில் வரும் 21-ம் தேதி நடைபெறுகிறது.
இந்தியா – மாலத்தீவுகள் இன்று மோதல்: இந்தியா – மாலத்தீவுகள் அணிகள் இடையிலான நட்பு ரீதியிலான கால்பந்து போட்டி ஷில்லாங்கில் உள்ள நேரு விளையாட்டரங்கில் இன்று இரவு 7 மணிக்கு நடைபெறுகிறது. இந்த ஆட்டத்தில் இந்திய அணியில் 40 வயதான சுனில் ஷேத்ரி களமிறங்க உள்ளது எதிர்பார்ப்பை ஏற்படுத்தியுள்ளது. கடந்த ஆண்டு ஓய்வை அறிவித்த அவர், இந்த மாதத்தின் தொடக்கத்தில் மீண்டும் சர்வதேச போட்டிகளில் களமிறங்குவதாக அறிவித்தார்.
வரும் 25-ம் தேதி ஏஃஎப்சி ஆசிய கோப்பை தகுதி சுற்றில் இந்தியா, வங்கதேசத்தை எதிர்த்து விளையாட உள்ளது. இந்த ஆட்டத்துக்கான சிறந்த பயிற்சியாக மாலத்தீவுகள் அணிக்கு எதிரான போட்டி அமையும் என எதிர்பார்க்கப்படுகிறது.
ஹாட்ரிக் விக்கெட் வீழ்த்திய ஷபாலி வர்மா: 23 வயதுக்கு உட்பட்டோருக்கான மகளிர் ஒருநாள் கிரிக்கெட் தொடர் குவாஹாட்டியில் நடைபெற்று வருகிறது. இதில் நேற்று ஹரியானா – கர்நாடகா அணிகள் மோதின. இதில் ஹரியானா அணிக்காக களமிறங்கிய ஷபாலி வர்மா பந்து வீச்சில் ஹாட்ரிக் விக்கெட் வீழ்த்தி அசத்தினார். பகுதி நேர சுழற்பந்து வீச்சாளரான அவர், 44-வது ஓவரின் கடைசி இரு பந்துகளில் கர்நாடக அணியைச் சேர்ந்த சலோனி, சவுமியா ஆகியோரை ஆட்டமிழக்கச் செய்தார். இதன் பின்னர் 46-வது ஓவரின் முதல் பந்தில் நிமிதா டிஸோசாவை ஆட்டமிழக்கச் செய்து ஹாட்ரிக் சாதனை படைத்தார். இந்த ஆட்டத்தில் ஹரியானா அணி 6 விக்கெட்கள் வித்தியாசத்தில் வெற்றி பெற்று கால் இறுதி சுற்றுக்கு முன்னேறியது.
