நிலையான வைப்புத்தொகைகளின் வட்டி விகிதங்களில் அதிரடி மாற்றம்.. காரணம் என்ன?

கவர்னராக பொறுப்பேற்றதும் சஞ்சய் மல்ஹோத்ரா, முதல் வேலையாக ரெப்போ ரேட்டில் மாற்றத்தைக் கொண்டு வந்தார். அதாவது, பணவீக்கம் 4% ஐ நெருங்கி வருவதால், சரியான நேரத்தில் ரெப்போ ரேட்டை 6.25% ஆக குறைத்தார். கடந்த ஐந்து ஆண்டுகளில் முதல் முறையாக ரெப்போ ரேட் குறைக்கப்பட்டது இதுவே முதல்முறை என்பது குறிப்பிடத்தக்கது.

ரிசர்வ் வங்கி ஆளுநரின் இந்த நடவடிக்கையை தொடர்ந்து, இந்தியாவில் உள்ள சில வங்கிகளும் தங்களது வட்டி விகிதங்களில் குறிப்பிடத்தக்க மாற்றங்களைக் கொண்டு வந்துள்ளன.

அதன்படி, தனியார் வங்கியான டிசிபி வங்கி, குறிப்பிட்ட சில காலங்களுக்கு ரூ.3 கோடிக்கு குறைவான நிலையான வைப்புத்தொகைகளுக்கான வட்டி விகிதங்களை 65 அடிப்படைப் புள்ளிகள் வரை குறைத்துள்ளது. இந்த திருத்தப்பட்ட விகிதங்கள், பிப்ரவரி 14, 2025 முதல் அமலுக்கு வந்துள்ளதாக வங்கியின் வலைத்தளம் தெரிவித்துள்ளது.

2025 பிப்ரவரி எம்பிசி (MPC) கூட்டத்தில் ரிசர்வ் வங்கி, அதன் ரெப்போ ரேட்டை 25 அடிப்படைப் புள்ளிகள் குறைத்து 6.25 சதவீதமாக மாற்ற முடிவு செய்ததைத் தொடர்ந்து, நிலையான வைப்பு விகிதங்களில் இத்தகைய திருத்தம் செய்யப்பட்டது.

கடன் மற்றும் நிலையான வைப்பு நிதிகளின் வட்டி விகிதங்கள் ரெப்போ ரேட் குறைப்பால் பாதிக்கப்படுகின்றன, ஏனெனில் இது வங்கிகளின் நிதிச் செலவைக் குறைக்கிறது. குறைந்த ரெப்போ ரேட்டால் நிலையான வைப்புத்தொகையின் (FD) வட்டி விகிதங்களும் குறையும், மேலும் நேர்மாறாகவும் இருக்கும்.

புதிய வட்டி விகிதங்கள்

மாற்றத்திற்குப் பிறகு, டிசிபி (DCB) வங்கி தற்போது ரூ.3 கோடிக்கு குறைவான நிலையான வைப்புத்தொகையை கொண்டிருக்கும் வழக்கமான குடிமக்களுக்கு, 3.75% முதல் 8.05% வரையிலான வட்டி விகிதங்களை வழங்குகிறது, இது 7 நாட்கள் முதல் 10 ஆண்டுகள் வரையிலான கால அவகாசத்தை கொண்டது. 19 முதல் 20 மாதங்கள் வரையிலான நிலையான வைப்புத்தொகைகளுக்கு, 8.05% என அதிகபட்ச வட்டி விகிதம் வழங்கப்படுகிறது.

ரூ.3 கோடிக்கு குறைவான நிலையான வைப்புத்தொகைகளில், மூத்த குடிமக்களுக்கு 4.25% முதல் 8.55% வரையிலான வட்டி விகிதங்கள் வழங்கப்படுகிறது. அதே நேரத்தில், 19 முதல் 20 மாத கால அளவை கொண்ட நிலையான வைப்புத்தொகைக்கு 8.55% என அதிகபட்ச வட்டி விகிதத்தை வழங்குகிறது.

எந்த நிலையான வைப்புத்தொகைக்கு வட்டி விகிதங்கள் குறைக்கப்பட்டுள்ளன?

அனைத்து மக்களுக்குமான 26 மாதங்களுக்கு மேலான மற்றும் 37 மாதங்களுக்கு குறைவான கால அளவை கொண்ட நிலையான வைப்புத்தொகைக்கு, 55 அடிப்படைப் புள்ளிகள் குறைப்பால், வட்டி விகிதம் 8.05% இலிருந்து 7.50% ஆகக் குறைக்கப்பட்டுள்ளது. 37 முதல் 38 மாதங்களுக்கு இடையிலான கால அளவை கொண்ட நிலையான வைப்புத்தொகைகளுக்கு வட்டி விகிதம் 8.05% இலிருந்து 7.85% ஆகக் குறைக்கப்பட்டுள்ளது.

கூடுதலாக, டிசிபி வங்கி 38 மாதங்களுக்கும் மேலான மற்றும் 61 மாதங்களுக்கும் குறைவான கால அளவை கொண்ட நிலையான வைப்புத்தொகைக்கு வட்டி விகிதத்தை 65 அடிப்படைப் புள்ளிகளை வைத்து, 8.05% இலிருந்து 7.40% ஆகக் குறைத்துள்ளது.