ஆப்கானிஸ்தானை அசத்தலாக வீழ்த்தியது தென் ஆப்பிரிக்கா..! 107 ரன்கள் வித்தியாசத்தில் வென்று அபாரம்

9-வது சாம்பியன்ஸ் கோப்பை கிரிக்கெட் போட்டி பாகிஸ்தான் மற்றும் துபாயில் நடைபெறுகிறது. கராச்சியில் நேற்று நடந்த 3-வது லீக் ஆட்டத்தில், தென் ஆப்பிரிக்கா – ஆப்கானிஸ்தான் அணிகள் மோதின.

டாஸ் வென்ற தென் ஆப்பிரிக்கா முதலில் பேட்டிங்கைத் தொடங்கியது. தொடக்க வீரரான டோனி ஜி ஜோர்ஜி 11 ரன்களில் அவுட் ஆனாலும், ரியான் ரிக்கல்டன் உடன் ஜோடி சேர்ந்த பவுமா 58 ரன்களும், ரிக்கல்டன் 103 ரன்களும் குவித்தனர். இதனால் 50 ஓவர்கள் முடிவில் தென் ஆப்பிரிக்கா அணி 6 விக்கெட்டுகளை இழந்து 315 ரன்கள் குவித்தது.

316 ரன்கள் எடுத்தால் வெற்றி என்ற இலக்குடன் களமிறங்கிய ஆப்கானிஸ்தான் வீரர்கள், தென் ஆப்பிரிக்காவின் பந்துவீச்சை சமாளிக்க முடியாமல், அடுத்தடுத்து விக்கெட்டுகளை இழந்தனர். இதனால், ஆப்கானிஸ்தான் அணி 43.3 ஓவர்களில் அனைத்து விக்கெட்டுகளையும் இழந்து 208 ரன்கள் மட்டுமே எடுத்தது. அதிகபட்சமாக ரஹமது ஷா 90 ரன்கள் எடுத்தார். இதன்மூலம் 107 ரன்கள் வித்தியாசத்தில் தென் ஆப்பிரிக்கா அபார வெற்றி பெற்றது.

இதையும் படிக்க: மீண்டும் சென்னை அணியில் இடம்பெறுகிறாரா சுரேஷ் ரெய்னா? 

சாம்பியன்ஸ் கோப்பை தொடரின் இன்றைய போட்டியில், ஆஸ்திரேலியா – இங்கிலாந்து அணிகள் மோதுகின்றன. லாகூரில் நடக்கும் இந்தப் போட்டியில் யாருக்கு வெற்றி கிடைக்கும் என்ற எதிர்பார்ப்பு கிரிக்கெட் ரசிகர்களிடையே எழுந்துள்ளது.