‘உங்களின் முன்னேற்றத்திற்கு சுய சிந்தனையை நம்புங்கள்’ – மாணவர்களுக்கு முகேஷ் அம்பானி அறிவுரை

குஜராத் மாநிலம் பண்டித தீன தயாள் பல்கலைக்கழகத்தில் பட்டம் அளிப்பு விழா நடைபெற்றது. இதில் தலைமை விருந்தினராக ரிலையன்ஸ் குழும தலைவரும், பல்கலைக் கழகத்தின் சேர்மனுமான முகேஷ் அம்பானி கலந்து கொண்டார்.

இந்த விழாவில் மாணவர்கள் மத்தியில் முகேஷ் அம்பானி பேசியதாவது, “செயற்கை நுண்ணறிவு தொழில்நுட்பமும், பசுமை எரிசக்தியும் தான் இந்தியாவின் எதிர்காலத்தில் முக்கிய அம்சங்களாக இருக்கும். சுற்றுச்சூழலை பாதிப்பு அடைய செய்து பொருளாதார வளர்ச்சியை ஏற்படுத்தி விடக்கூடாது. இந்த இடத்தில் பசுமை தொழில்நுட்பம் முக்கிய பங்கு வகிக்கும்.

அடுத்த மூன்று ஆண்டுகளுக்குள் இந்தியா உலகின் மூன்றாவது பொருளாதார சக்தியாக மாறும். இதனை யாராலும் தடுக்க முடியாது. ஏனென்றால் நம்முடைய பிரதமரின் தொலைநோக்கு திட்டங்கள் பொருளாதார வளர்ச்சியை உறுதி செய்வதாக உள்ளன.

AI எனப்படும் செயற்கை நுண்ணறிவை மாணவர்கள் அதிகம் பயன்படுத்த தொடங்கியுள்ளனர். உண்மையிலேயே அது பயனளிக்கிறது. செயற்கை நுண்ணறிவு தொழில்நுட்பத்தை ஒரு கருவியாக தான் பயன்படுத்த வேண்டும். ஆனால் மாணவர்கள் தங்களது முன்னேற்றத்திற்கு சுய சிந்தனையை நம்ப வேண்டும்.

இதையும் படிங்க – Budget 2025 Live : மத்திய பட்ஜெட் 2025 தாக்கல் செய்யப்படுவதை நேரலையில் பார்க்கலாம்.. எந்த சேனலில் தெரியுமா?

குஜராத்தின் முதல்வராக இருந்தபோது எரிசக்தி துறை மேம்பாட்டுக்கு ஏராளமான நடவடிக்கைகளை பிரதமர் மோடி எடுத்துள்ளார். அவரைப் பார்த்து மக்கள் அடிக்கடி வியப்பு அடைகிறார்கள். உண்மையிலேயே அவர் ஓய்வு எடுப்பாரா? என்ற சந்தேகம் பலருக்கு உண்டு. உண்மை என்னவென்றால் வேலை செய்வதால் ஏற்படும் மாற்றம்தான் ஓய்வாக கருதப்பட வேண்டும். அது பிரதமருக்கு மட்டுமின்றி நமக்கும் அதனை கொள்கையாக வைத்துக் கொள்ள வேண்டும்” என்று தெரிவித்தார்.