5 லட்சம் யூனிட் உற்பத்தி மைல்கல்லை தாண்டி சாதனை படைத்த டாடா பஞ்ச்.. அதிகம் விற்பனையாக காரணம் என்ன?

இந்த சாதனை மைல்கல்லில் Tata Punch காரின் பெட்ரோல், சிஎன்ஜி மற்றும் எலெக்ட்ரிக் வேரியன்ட்ஸ்களின் உற்பத்தி எண்ணிக்கை அடங்கும். டாடா மோட்டார்ஸ் நிறுவனத்தின் இந்த மாடல் சமீபத்தில் தான் 2024-ஆம் ஆண்டில் இந்தியாவில் அதிகம் விற்பனையான காராக உருவெடுத்தது. இதன் மூலம் நீண்ட ஆண்டுகளாக (சுமார் நான்கு தசாப்தங்களாக) இந்த இடத்தை தக்க வைத்துகொண்டிருந்த மாருதி சுசுகியை, டாடா மோட்டார்ஸ் வீழ்த்தியது.

டாடா பஞ்ச் இவ்வளவு பிரபலமாக விற்பனையாக காரணம் என்ன?

Punch காரின் விற்பனை அதிகமாக இருக்க முக்கிய காரணம் அதன் மலிவு விலை ஆகும். இதுமட்டுமின்றி வாகனத்தில் உள்ள நடைமுறை மற்றும் பாதுகாப்பு அம்சங்கள் ஆகியவற்றின் கலவையும் இந்த மாடல் விற்பனையில் சக்கை போடு போட காரணமாக உள்ளன. முக்கியமாக இந்த மாடல் ஹை-கிரவுண்ட் கிளியரன்ஸ், காமாண்டிங் டிரைவிங் பொசிஷன்ஸை கொண்டு நகரத்திற்கு ஏற்ற தொகுப்பில் SUV போன்ற அனுபவத்தை வாடிக்கையாளர்களுக்கு வழங்குகிறது.

பாதுகாப்பு அம்சங்களைப் பொறுத்தவரை டாடா நிறுவனத்தின் பஞ்ச் மாடலில் டூயல் ஏர்பேக்ஸ், ISOFIX சைல்ட் சீட் மவுண்ட்ஸ், EBD உடன் கூடிய ABS மற்றும் எலக்ட்ரானிக் ஸ்டெபிலிட்டி ப்ரோகிராம் போன்ற சிறந்த அம்சங்களுடன் வருகிறது. இந்த அம்சங்கள் கொண்ட பஞ்ச் மாடல் குளோபல் NCAP கிராஷ் டெஸ்ட்டில் பெரியவர்களுக்கான பாதுகாப்பிற்காக 5 ஸ்டார் ரேட்டிங்கையும், குழந்தைகளுக்கான பாதுகாப்பிற்காக 4 ஸ்டார் ரேட்டிங்கையும் பெற்றுள்ளது.

தவிர பாரத் NCAP தரநிலைகளின் கீழ் சோதிக்கப்பட்ட அனைத்து டாடா வாகனங்களிலும் மிக உயர்ந்த பாதுகாப்பு மதிப்பீட்டை டாடா பஞ்ச் EV பெற்றுள்ளதும் குறிப்பிடத்தக்கது. டாடா மோட்டார்ஸ் நிறுவனம் பலதரப்பட்ட வாடிக்கையாளர்களின் விருப்பங்களை பூர்த்தி செய்யும் வகையில் பல வேரியன்ட்ஸ்களில் Punch மாடலை வழங்குகிறது. பெட்ரோல் மூலம் இயங்கும் வெர்ஷனில் 1.2 லிட்டர் ரெவோட்ரான் எஞ்சின் பொருத்தப்பட்டுள்ளது, இது 87.8 PS மற்றும் 115 Nm பீக் டார்க்கை உற்பத்தி செய்கிறது. இதில் வாடிக்கையாளர்கள் மேனுவல் மற்றும் AMT ட்ரான்ஸ்மிஷன் ஆப்ஷன்களுக்கு இடையே தேர்வு செய்யலாம்.

இந்த மாடலின் சிஎன்ஜி வெர்ஷனை ரூ.7.29 லட்சம் எக்ஸ்-ஷோரூம் விலையில் தொடங்கி ரூ.9.99 லட்சம் வரையிலான எக்ஸ்-ஷோரூம் விலையில் வாங்கலாம். பஞ்ச்-இன் பெட்ரோல்-ஒன்லி வேரியன்ட் ரூ.5.99 லட்சம் முதல் ரூ.9.71 லட்சம் வரையிலான எக்ஸ்-ஷோரூம் விலையில் கிடைக்கிறது அதே நேரம் பஞ்ச் EV ரூ.9.99 லட்சம் எக்ஸ்-ஷோரூம் விலையில்தொடங்கி ரூ.14.44 லட்சம் வரையிலான எக்ஸ்-ஷோரூம் விலையில் கிடைக்கிறது.