ராஜ்கோட்: இந்தியா மற்றும் இங்கிலாந்து அணிகள் இடையிலான மூன்றாவது டி20 போட்டியில் இங்கிலாந்து அணி 20 ஓவர்களில் 171 ரன்கள் எடுத்தது. இந்திய சுழற்பந்து வீச்சாளர் வருண் சக்கரவர்த்தி 5 விக்கெட்டுகளை வீழ்த்தி அசத்தினார்.
ஜாஸ் பட்லர் தலைமையிலான இங்கிலாந்து கிரிக்கெட் அணி இந்தியாவில் சுற்றுப்பயணம் செய்து விளையாடி வருகிறது. இரு அணிகள் இடையிலான 5 ஆட்டங்கள் கொண்ட இருதரப்பு டி20 கிரிக்கெட் தொடரில் இந்திய அணி 2-0 என முன்னிலை வகிக்கிறது. இந்நிலையில் இரு அணிகளும் இன்று 3-வது ஆட்டத்தில் ராஜ்கோட்டில் விளையாடி வருகின்றன. இதில் டாஸ் வென்ற இந்திய அணி முதலில் பவுலிங் செய்ய முடிவு செய்தது.
இங்கிலாந்தின் பென் டக்கெட் மற்றும் பில் சால்ட் இணைந்து இன்னிங்ஸை ஓபன் செய்தனர். இதில் சால்ட் 5 ரன்களில் வெளியேறினார். கேப்டன் பட்லர் 24 ரன்கள் எடுத்தார். பென் டக்கெட், 28 பந்துகளில் 51 ரன்கள் எடுத்தார். 10 ஓவர்கள் முடிவில் 87 ரன்களுக்கு 3 விக்கெட்டுகளை இழந்திருந்தது இந்தியா. அதன் பின்னர் ஹாரி ப்ரூக், ஜேமி ஸ்மித், ஜேமி ஓவர்டன், பிரைடன் கார்ஸ், ஆர்ச்சர் ஆகியோர் விரைந்து ஆட்டமிழந்தனர். லியாம் லிவிங்ஸ்டன் 24 பந்துகளில் 43 ரன்கள் விளாசினார். அவரது இன்னிங்ஸில் 5 சிக்ஸர்கள் அடங்கும். 20 ஓவர்களில் 9 விக்கெட்டுகளை இழப்புக்கு 171 ரன்கள் எடுத்தது இங்கிலாந்து.
இந்தியா சார்பில் வருண் சக்கரவர்த்தி 4 ஓவர்கள் வீசி 24 ரன்கள் கொடுத்து 5 விக்கெட்டுகளை கைப்பற்றினார். இந்தப் போட்டியில் ஹாட்ரிக் விக்கெட் வீழ்த்தும் வாய்ப்பை அவர் மிஸ் செய்தார். ஹர்திக் பாண்டியா 2, ரவி பிஷ்னோய் மற்றும் அக்சர் படேல் தலா 1 விக்கெட் வீழ்த்தினர். தற்போது 172 ரன்கள் எடுத்தால் வெற்றி என்ற இலக்கை இந்தியா விரட்டுகிறது.
