மெர்பர்ன்: ஆஸ்திரேலிய ஓபன் டென்னிஸ் தொடரில் ஆடவர் ஒற்றையர் பிரிவில் முதல் நிலை வீரரான இத்தாலியின் ஜன்னிக் சின்னர், மகளிர் ஒற்றையர் பிரிவில் 2-ம் நிலை வீராங்கனையான போலந்தின் இகா ஸ்வியாடெக் உள்ளிட்டோர் கால் இறுதி சுற்றுக்கு முன்னேறினர்.
மெர்பர்ன் நகரில் நடைபெற்று வரும் இந்தத் தொடரின் 9-வது நாளான நேற்று ஆடவர் ஒற்றையர் பிரிவில் நடைபெற்ற 4-வது சுற்று ஆட்டத்தில் முதல் நிலை வீரரும் நடப்பு சாம்பியனுமான இத்தாலியின் ஜன்னிக் சின்னர், 13-ம் நிலை வீரரான டென்மார்க்கின் ஹோல்கர் ரூனேவுடன் மோதினார். இதில் ஜன்னிக் சின்னர் 6-3, 3-6, 6-3, 6-2 என்ற செட் கணக்கில் வெற்றி பெற்று கால் இறுதி சுற்றுக்கு முன்னேறினார்.
21-ம் நிலை வீரரான அமெரிக்காவின் பென் ஷெல்டன், 41-ம் நிலை வீரரான பிரான்ஸின் கேல் மோன்பில்ஸை எதிர்த்து விளையாடினார். இதில் பென் ஷெல்டன் 7-6 (7-3), 6-7 (3-7), 7-6 (7-2), 1-0 என்ற செட் கணக்கில் முன்னிலையில் இருந்த போது கேல் மோன்பில்ஸ் காயம் காரணமாக போட்டியில் இருந்து விலகினார். இதனால் பென் ஷெல்டன் கால் இறுதி சுற்றில் கால்பதித்தார்.
55-ம் நிலை வீரரான இத்தாலியின் லோரென்சோ சோனேகோ 6-3, 6-2, 3-6, 6-1 என்ற செட் கணக்கில் 121-ம் நிலை வீரரான அமெரிக்காவின் லர்னர் டியனை வீழ்த்தி கால் இறுதி சுற்றுக்கு முன்னேறினார். 8-ம் நிலை வீரரான ஆஸ்திரேலியாவின் அலெக்ஸ் டி மினார் 6-0, 7-6 (7-5), 6-3 என்ற நேர் செட் கணக்கில் அமெரிக்காவின் அலெக்ஸ் மைக்கேல்சனை வீழ்த்தி கால் இறுதி சுற்றில் நுழைந்தார்.
மகளிர் ஒற்றையர் பிரிவு 4-வது சுற்று ஆட்டத்தில் 2-ம் நிலை வீராங்கனையான போலந்தின் இகா ஸ்வியாடெக் 6-0, 6-1 என்ற நேர் செட் கணக்கில் ஜெர்மனியின் இவா லைஸையும், 8-ம் நிலை வீராங்கனையான அமெரிக்காவின் எம்மா நவர்ரோ 6-4, 5-7, 7-5 என்ற செட் கணக்கில் 9-ம் நிலை வீராங்கனையான ரஷ்யாவின் தரியா கசட்கினாவையும், 28-ம் நிலை வீராங்கனையான உக்ரைனின் எலினா ஸ்விட்டோலினா 6-4, 6-1 என்ற செட் கணக்கில் ரஷ்யாவின் வெரோனிகா குடெர்மெடோவாவையும் வீழ்த்தி கால் இறுதி சுற்றுக்கு முன்னேறினர்.
6-ம் நிலை வீராங்கனையான கஜகஸ்தானின் எலெனா ரைபகினா 3-6, 6-1, 3-6 என்ற செட் கணக்கில் 19-ம் நிலை வீராங்கனையான அமெரிக்காவின் மேடிசன் கீஸிடம் தோல்வி அடைந்து கால் இறுதி சுற்றுக்கு முன்னேறும் வாய்ப்பை இழந்தார்.
