கராச்சி: கிரெய்க் பிராத்வெயிட் தலைமையிலான மேற்கு இந்தியத் தீவுகள் அணி 2 டெஸ்ட் போட்டிகள் கொண்ட தொடரில் விளையாடுவதற்காக நேற்று பாகிஸ்தான் சென்றடைந்தது. அந்த அணி 18 வருடங்களுக்குப் பிறகு பாகிஸ்தான் சென்றுள்ளது. கடைசியாக 2006-ம் ஆண்டு மேற்கு இந்தியத் தீவுகள் அணி பாகிஸ்தானில் கிரிக்கெட் போட்டிகளில் விளையாடி இருந்தது.
இரு அணிகள் இடையிலான முதல் டெஸ்ட் போட்டி வரும் 17-ம் தேதி முல்தான் நகரில் தொடங்குகிறது. கடைசி மற்றும் 2-வது டெஸ்ட் போட்டி இதே மைதானத்தில் ஜனவரி 25-ம் தேதி நடைபெறுகிறது. முன்னதாக மேற்கு இந்தியத் தீவுகள் அணி 3 நாட்கள் கொண்ட பயிற்சி ஆட்டத்தில் விளையாட உள்ளது. இந்த ஆட்டம் வரும் 10-ம் தேதி இஸ்லாமாபாத்தில் தொடங்குகிறது.
இரு அணிகளுமே ஐசிசி உலக டெஸ்ட் சாம்பியன்ஷிப் இறுதிப் போட்டிக்கு தகுதி பெறவில்லை. இந்த டெஸ்ட் சாம்பின்ஷிப் சுழற்சியில் இரு அணிகளுக்கும் இது கடைசி தொடராகும்.
மேற்கு இந்தியத் தீவுகள் அணி விவரம்: கிரெய்க் பிராத்வெயிட் (கேப்டன்), அலிக் அதானேஸ், கீசி கார்டி, ஜோசுவா டி சில்வா, ஜஸ்டின் கிரீவ்ஸ், கவேம் ஹாட்ஜ், டெவின் இம்லாச், அமீர் ஜங்கு, மிகைல் லூயிஸ், குடகேஷ் மோதி, ஆண்டர்சன் பிலிப், கேமர் ரோச், ஜேடன் சீல்ஸ், கெவின் சின்கிளேர், ஜோமல் வாரிகன்.
