“குகேஷின் தன்னம்பிக்கை ஊக்கமளிக்கிறது..” – பிரதமர் மோடி புகழாரம்

உலக செஸ் சாம்பியன் பட்டம் வென்ற தமிழகத்தைச் சேர்ந்த டி.குகேஷ் தனது பெற்றோருடன் சென்று பிரதமர் மோடியை சந்தித்தார். இந்த சந்திப்பின்போது, குகேஷ் மற்றும் அவரது பெற்றோருடன் பிரதமர் மோடி கலந்துரையாடினார்.

பின்னர் சந்திப்பு குறித்து தனது எக்ஸ் பக்கத்தில் பதிவிட்டுள்ள பிரதமர் மோடி, செஸ் சாம்பியனும், இந்தியாவின் பெருமையுமான குகேஷுடன் சிறப்பான உரையாடல் நடந்ததாக கூறியுள்ளார். சில ஆண்டுகளாக தான் குகேஷ் உடன் பேசி வருவதாக கூறியுள்ள பிரதமர் மோடி, அவருடைய உறுதியும் அர்ப்பணிப்பும் தன்னை மிகவும் கவர்ந்ததாக குறிப்பிட்டுள்ளார்.

சில ஆண்டுகளுக்கு முன்பு, அவர் உலகின் இளம்வயது செஸ் சாம்பியன் ஆவேன் எனக் கூறிய வீடியோவைப் பார்த்தது தமக்கு நினைவிருப்பதாக கூறியுள்ள பிரதமர் மோடி, இன்று அவரது சொந்த முயற்சியால் அந்த லட்சியம் உண்மையாகிவிட்டதாக சுட்டிக்காட்டியுள்ளார். இதனிடையே, உலகச் சாம்பியன்ஷிப் போட்டியில் தான் விளையாடிய, செஸ் போர்டை பிரதமருக்கு குகேஷ் பரிசளித்தார்.