Manmohan Singh Funeral | முன்னாள் பிரதமர் மன்மோகன் சிங் உடலுக்கு சீக்கிய மதப்படி இறுதிச் சடங்கு… 21 குண்டுகள் முழங்க அரசு மரியாதையுடன் உடல் தகனம்

முன்னாள் பிரதமரும், காங்கிரஸ் மூத்தத் தலைவருமான மன்மோகன் சிங் உடல்நலக் குறைவால் நேற்று முன் தினம் இரவு காலமானார். டெல்லி மோதிலால் நேரு சாலையில் உள்ள இல்லத்தில் அஞ்சலிக்காக வைக்கப்பட்டிருந்த அவரது உடல் இன்று காலை 9 மணியளவில் காங்கிரஸ் தலைமை அலுவலகத்திற்கு கொண்டு வரப்பட்டது. கட்சி கொடியை சோனியா காந்தி மன்மோகன் சிங்கின் உடல் மீது வைத்து இறுதி மரியாதை செலுத்தினார். இதேபோன்று மல்லிகார்ஜுன கார்கே, ராகுல் காந்தி, பிரியங்கா காந்தி உள்ளிட்டோர் அஞ்சலி செலுத்தினர்.

அதன்பின் அலங்கரிக்கப்பட்ட ராணுவ வாகனத்தில் மன்மோகன் சிங்கின் உடல் வைக்கப்பட்டு மயானத்தை நோக்கி ஊர்வலமாக எடுத்துச் செல்லப்பட்டது. அதே வாகனத்தில் ராகுல் காந்தியும் கவலை தோய்ந்த முகத்துடன் பயணம் மேற்கொண்டார். மயானம் வரை வழிநெடுக மன்மோகன் சிங் உடலுக்கு ஏராளமானோர் அஞ்சலி செலுத்தினர்.

ராணுவ மரியாதையுடன் இறுதிச் சடங்கு

காலை 11.30 மணியளவில் இறுதி ஊர்வலம் நிகம்போத் காட் மயானத்தை அடைந்தது. அங்கு மன்மோகன் சிங் உடலுக்கு ராணுவ மரியாதையுடன் இறுதிச் சடங்கு நடைபெற்றது. குடியரசுத் தலைவர் திரவுபதி முர்மு மலர் வளையம் வைத்து இறுதி அஞ்சலி செலுத்தினார்.

அதைத்தொடர்ந்து குடியரசுத் துணைத் தலைவர் ஜெகதீப் தன்கர், பிரதமர் நரேந்திர மோடி ஆகியோர் மன்மோகன் சிங் உடலுக்கு இறுதி மரியாதை செலுத்தினார்.

அதன்பின் மத்திய அமைச்சர்கள் ஜெ.பி. நட்டா, ராஜ்நாத் சிங், காங்கிரஸ் மூத்த தலைவர் சோனியா காந்தி, ராகுல் காந்தி, முப்படை தலைமை தளபதி அனில் சவுகான், பூட்டான் மன்னர் ஜிக்மி ஹிசர் உள்ளிட்டோர் மன்மோகன் சிங் உடலுக்கு அஞ்சலி செலுத்தினர்.

இதையும் படிங்க : மன்மோகன் சிங்கின் இறுதிச்சடங்கு ஏன் இன்று நடைபெறவில்லை..?

பின்னர் முழு அரசு மரியாதை மற்றும் சீக்கிய மதப்படி மன்மோகன் சிங் உடலுக்கு இறுதிச் சடங்குகள் செய்யப்பட்டன. மன்மோகன் சிங் உடல் மீது போர்த்தப்பட்டிருந்த தேசிய கொடி அவரது மனைவியிடம் ஒப்படைக்கப்பட்டது. இறுதியாக 21 குண்டுகள் முழங்க அரசு மரியாதையுடன் மன்மோகன் சிங் உடல் எரியூட்டப்பட்டது.