ஒரே நாடு ஒரே தேர்தல் – தெரிந்துகொள்ள வேண்டியவை என்ன? – News18 தமிழ்

ஒரே நாடு ஒரே தேர்தல் மசோதாவை இனி நாடாளுமன்ற கூட்டுக்குழு ஆய்வுக்கு உட்படுத்தும். கூட்டுக்குழு ஆய்வுக்குப் பிறகு மசோதா மீண்டும் நாடாளுமன்றத்தில் அறிமுகம் செய்யப்படும். இந்நிலையில், இந்த மசோதா குறித்து பார்க்கலாம்.

• முன்னாள் குடியரசுத் தலைவர் ராம் நாத் கோவிந்த் கொடுத்த அறிக்கையில், அடிக்கடி தேர்தல் நடப்பதால், பொருளாதாரம், சமூகம், அரசியல் ஆகியவற்றில் எதிர்மறையான தாக்கம் ஏற்படுகிறது. இதைச் சமாளிக்க ஒரே நேரத்தில் தேர்தல் நடத்துவதை நடைமுறைப்படுத்த தெரிவித்தது.

• முதலில் நாடாளுமன்ற மக்களவைக்கும் சட்டமன்றங்களுக்கும் தேர்தல் நடைபெறும். அது முடிந்த 100 நாளில் உள்ளாட்சி அமைப்புகளுக்குத் தேர்தல் நடத்த வேண்டும்.

• புதிதாக அமைக்கப்படும் மாநில சட்டசபைகளின் கால அவகாசம், அடுத்த பொதுத் தேர்தலுடன் இணைந்ததாக இருக்கும்.

• முன்னாள் குடியரசுத் தலைவர் ராம்நாத் கோவிந்த் அறிக்கையில், இந்தச் சீர்திருத்தங்களை வெற்றிகரமாகச் செயல்படுத்துவதை மேற்பார்வையிடவும் உறுதிப்படுத்தவும் ஒரு அமலாக்கக் குழுவை நிறுவுவதும் பரிந்துரைக்கப்பட்டது.

• பஞ்சாயத்துகள் மற்றும் நகராட்சிகளுக்கு ஒரே நேரத்தில் தேர்தல் நடத்துவதற்கு வசதியாக அரசியலமைப்புச் சட்டத்தில் 324A சட்டப்பிரிவு சேர்க்க முன்மொழியப்பட்டுள்ளது. அனைத்துத் தேர்தல்களுக்கும் ஒருங்கிணைந்த வாக்காளர் பட்டியல் மற்றும் புகைப்பட அடையாள அட்டையை உருவாக்குவதற்கான சட்டப்பிரிவு 325 இல் திருத்தம் ஒன்றையும் குழு முன்மொழிந்தது. ஆனால், இந்தத் திருத்தத்திற்கு மாநிலங்களின் ஒப்புதல் தேவைப்படும்.

• தொங்கு சட்டமன்றம் அல்லது நம்பிக்கையில்லா தீர்மானம் ஏற்பட்டால், புதிய தேர்தல்கள் நடத்தப்படும். ஆனால் புதிதாகத் தேர்ந்தெடுக்கப்பட்ட சபையின் பதவிக்காலம் அடுத்த பொதுத் தேர்தல் வரை மட்டுமே நீடிக்கும்.

• திறமையான தேர்தல் நிர்வாகத்தை உறுதி செய்வதற்காக EVM மற்றும் VVPAT போன்ற அத்தியாவசிய உபகரணங்களை வாங்குவதற்கு முன்கூட்டியே திட்டமிடுமாறு தேர்தல் ஆணையத்திற்கு அறிவுறுத்தப்பட்டுள்ளது.

.