– கண்டுபிடிக்க உதவி கோரும் பொலிஸார்
கொள்ளை சம்பவம் ஒன்றுடன் தொடர்புடைய இரு சந்தேகநபர்களை கைது செய்வதற்கு பொலிஸார் பொதுமக்களிடம் உதவி கோரியுள்ளனர்.
மினுவாங்கொடை பிரதேசத்தில் உள்ள தனியார் நிறுவனம் ஒன்றில் பணிபுரியும் ஊழியர்கள் சிலர் ரூ. 7 1/2 கோடி பெறுமதியான பணத்தை நிறுவனத்துக்குச் சொந்தமான வாகனமொன்றில் கொண்டு சென்றுள்ளனர்.
ஊழியர்கள் வாகனத்திலிருந்து வெளியே இறங்கியவேளையில் வாகனத்தின் சாரதியாக கடமையாற்றிய சந்தேகநபர் வாகனத்திலிருந்த ரூ. 7 1/2 கோடியை கொள்ளையிட்டு, பணத்துடன் அதே வாகனத்தில் தப்பிச் சென்றுள்ளதாக பொலிஸார் தெரிவித்தனர்.
இதன்பின்னர், குறித்த வாகனம் கம்பஹா – உக்கல்பொட பிரதேசத்தில் கைவிடப்பட்ட நிலையில் பொலிஸாரால் மீட்கப்பட்டுள்ளது.
இந்நிலையில், பணத்துடன் தப்பிச் சென்ற நிறுவன சாரதியையும், மோட்டார் சைக்கிளை தந்து கொள்ளை சம்பவத்திற்கு உதவிய மற்றுமொரு சந்தேகநபரையும் கைது செய்வதற்காக பொலிஸார் பொதுமக்களின் உதவியை நாடியுள்ளனர்.
இதற்கமைய, அவர்களின் புகைப்படங்களை ஊடகங்களில் வெளியிட பொலிஸார் நடவடிக்கை எடுத்துள்ளதோடு, இது தொடர்பில் தகவல் வழங்குவதற்காக இரண்டு தொலைபேசி இலக்கங்களையும் அறிமுகப்படுத்தியுள்ளனர்.
அதன்படி, சந்தேகநபர்கள் தொடர்பில் ஏதேனும் தகவல்கள் கிடைத்தால் 071 – 8591608 மற்றும் 071 – 8591610 ஆகிய தொலைப்பேசி இலக்கங்கள் வாயிலாக தொடர்பு கொண்டு தகவல்களை வழங்குமாறு பொலிஸார் தெரிவித்துள்ளனர்.
The post ரூ. 7 1/2 கோடியுடன் தப்பிச் சென்ற நிறுவன சாரதி appeared first on Thinakaran.
