சென்னை: இந்தியாவின் வலுவான கிளாசிக்கல் போட்டியான சென்னை கிராண்ட் மாஸ்டர்ஸ் செஸ் போட்டியின் 2-வது பதிப்பு சென்னை கோட்டூர்புரத்தில் உள்ள அண்ணா நூற்றாண்டு நூலகத்தில் நடைபெற்று வருகிறது. தொடரின் 3-வது நாளான நேற்று 3-வது சுற்று போட்டிகள் நடைபெற்றன.
மாஸ்டர்ஸ் பிரிவில் ஈரானின் அமீன் தபதாபேயி, பிரான்ஸின் மாக்சிம் வாச்சியர் லாக்ரேவுடன் மோதினார். இதில் கருப்பு காய்களுடன் விளையாடிய அமீன்தபதாபேயி 38-வது நகர்த்தலின்போது வெற்றியை வசப்படுத்தினார். 2-வது போர்டில் இந்தியாவின் விதித் குஜராத்தி சகநாட்டைச் சேர்ந்த அரவிந்த் சிதம்பரத்தை எதிர்கொண்டார். இந்த ஆட்டம் 48-வது நகர்த்தலின் போது டிராவில் முடிவடைந்தது.
3-வது போர்டில் அமெரிக்காவின் லெவோன் அரோனியன், ஈரானின் பர்ஹாம் மக்சூட்லூவுடன் பலப்பரீட்சை நடத்தினார். இதில் வெள்ளை காய்களுடன் விளையாடிய லெவோன் அரோனியன் 46-வது நகர்த்தலின் போது வெற்றி பெற்றார். 4-வது போர்டில் இந்தியாவின் அர்ஜுன் எரிகைசி, செர்பியாவின் அலெக்ஸி சரானாவை சந்தித்தார். கருப்பு காய்களுடன் விளையாடிய அர்ஜுன் எரிகைசி 37-வது காய் நகர்த்தலின்போது வெற்றியை வசப்படுத்தினார். இந்த வெற்றியின் மூலம் லைவ் ரேட்டிங்கில் அர்ஜுன் எரிகைசி 2805.8 புள்ளிகளுடன் உலக தரவரிசையில் 2-வது இடத்துக்கு முன்னேறினார்.
7 சுற்றுகள் கொண்ட இந்த தொடரில் 3 சுற்றுகளின் முடிவில் அமீன் தபதாபேயி, அர்ஜுன் எரிகைசி ஆகியோர் தலா 2.5 புள்ளிகளுடன் முதலிடத்தை பகிர்ந்து கொண்டுள்ளனர். லெவோன் அரோனியன் 2 புள்ளிகளுடன் 3-வது இடத்திலும், அரவிந்த் சிதம்பரம் 1.5 புள்ளிகளுடன் 4-வது இடத்திலும், மாக்சிம் வாச்சியர் லாக்ரேவ் 1.5 புள்ளிகளுடன் 5-வது இடத்திலும், பர்ஹாம் மக்சூட்லூ 1 புள்ளியுடன் 6-வது இடத்திலும், அலெக்ஸி சரானா 0.5 புள்ளிகளுடன் 7-வது இடத்திலும், விதித் குஜராத்தி 0.5 புள்ளிகளுடன் 8-வது இடத்திலும் உள்ளனர்.
சாலஞ்சர்ஸ் பிரிவில் 3-வது நாளான நேற்று 3-வது சுற்று ஆட்டங்கள் நடைபெற்றன. இதில் முதல் போர்டில் ரவுனக் சத்வானி, லியோன் மெண்டோன்காவுடன் மோதினார். இந்த ஆட்டம் 51-வது நகர்த்தலின் போது டிராவில் முடிவடைந்தது. 2-வது போர்டில் ஆர்.வைஷாலி, பிரனேஷுடன் பலப்பரீட்சை நடத்தினார். இதில்கருப்பு நிற காய்களுடன் விளையாடிய வைஷாலி 46-வது நகர்த்தலின் போது தோல்வி அடைந்தார்.
3-வது போர்டில் கார்த்திகேயன் முரளி, பிரணவை எதிர்கொண்டார். இதில் வெள்ளை காய்களுடன் விளையாடிய பிரணவ் 69-வது காய் நகர்த்தலின் போது வெற்றி கண்டார். இந்த ஆட்டம் சுமார் 4 மணி நேரத்துக்கு மேல் நடைபெற்றது. 4-வது போர்டில் ஹரிகாதுரோணவல்லி, அபிமன்யு புராணிக்கை சந்தித்தார். இதில் வெள்ளை காய்களுடன் விளையாடிய ஹரிகா துரோணவல்லி 51-வது நகர்த்தலின் போது ஆட்டத்தை டிரா செய்தார். தொடர்ச்சியாக இரு ஆட்டங்களில் தோல்வியை சந்தித்த ஹரிகா இந்த டிராவின் மூலம் தனது புள்ளி கணக்கை தொடங்கினார்.
