மன்னர்கள்கூட இப்படி கட்டியதில்லை.. ஜெகன்மோகன் கட்டிய பங்களா! கடுமையாக விமர்சிக்கும் சந்திரபாபு!

ஆந்திரப்பிரதேசத்தின் ருஷிகொண்டாவில் ஒய்எஸ்ஆர் காங்கிரஸ் ஆட்சியில் கட்டப்பட்ட சொகுசு மாளிகை மீண்டும் சர்ச்சையைக் கிளப்பியுள்ளது. இது சுற்றுச்சூழலுக்கு பேரழிவு என்று முதலமைச்சர் சந்திரபாபு நாயுடு விமர்சித்துள்ளார்.

இந்த ஆடம்பர மாளிகை, ஆந்திரப்பிரதேச மாநிலத்தின் விசாகப்பட்டினத்தில் உள்ள ருஷிகொண்டா மலைக்கு கீழே அமைந்துள்ளது. இது கடற்கரையோரம் 9.88 ஏக்கரில் முந்தைய ஒய்.எஸ்.ஆர்.காங்கிரஸ் ஆட்சியில் அமைக்கப்பட்டுள்ளது. சுமார் 20 ஆயிரம் சதுர மீட்டர் அளவுக்கான இந்த சொகுசு மாளிகையை, 500 கோடி ரூபாய் செலவில் அமைக்க திட்டமிடப்பட்டு, அதன் ஒட்டுமொத்த செலவு 680 கோடி ரூபாயாக அதிகரித்தது.

பொதுமக்களோ, செய்தியாளர்களோ அனுமதிக்கப்படாத நிலையில், சட்டப்பேரவைத் தேர்தலில் ஒய்.எஸ்.ஆர். காங்கிரஸ் கட்சி தோல்வியடைந்து, தெலுங்கு தேசம் கட்சி ஆட்சிக்கு வந்ததை அடுத்து, இந்த கட்டடத்தை தெலுங்குதேசம் எம்எல்ஏ-வும், முன்னாள் அமைச்சருமான காண்டா சீனிவாச ராவ், கடந்த ஜூன் மாதத்தில் பார்வையிட்டார்.

அப்போதுதான், 5 நட்சத்திர விடுதிக்கும் மேலான வசதிகளுடன் கூடிய சொகுசு மாளிகையின் காட்சிகள் வெளியாகின. தலா 15 லட்சம் ரூபாய் செலவுடன் 200 சரவிளக்குகள் அமைக்கப்பட்டுள்ளன. 33 கோடி ரூபாய் செலவில் உள்கட்டமைப்பு, இறக்குமதி செய்யப்பட்ட மேஜைகள், அழகு மையம், தலா 15 லட்சம் ரூபாய் செலவில் விசாலமான கழிவறைகள் இடம்பெற்றுள்ளன.

7 கட்டடங்களைக் கொண்டதாக இது அமைந்துள்ளது. அதிநவீன ஒலி அமைப்பு முறை, அற்புதமான திரையரங்கு கூடம், பல நிறங்களில் அலங்கார விளக்குகள் உள்ளிட்டவை இடம்பெற்றுள்ளன. இதன் முன்வளாகத்தில் இறக்குமதி செய்யப்பட்ட தாவரங்கள், புற்கள் ஆகியவை வைக்கப்பட்டுள்ளன. இந்த சொகுசு மாளிகைக்கு பலத்த காவல் துறை பாதுகாப்பும் போடப்பட்டிருந்தது.

ஏற்கனவே ஆந்திரப்பிரதேச சுற்றுலா வளர்ச்சி கழகம் நடத்திவந்த சுற்றுலா பயணிகள் தங்குமிடத்தை இடித்துவிட்டு, இந்தப் புதிய கட்டடம் கட்டப்பட்டுள்ளது. இந்த மாளிகை கடந்த பிப்ரவரி 29-ஆம் தேதி திறக்கப்பட்ட நிலையில், முதலமைச்சர் ஜெகன்மோகன் ரெட்டியின் வீடு மற்றும் முகாம் அலுவலகமாக இது பயன்படுத்தப்படும் என்று அப்போதைய சுற்றுலாத் துறை அமைச்சர் ரோஜா தெரிவித்தார். விசாகப்பட்டினத்தை நிர்வாகத் தலைநகராக ஜெகன்மோகன் ரெட்டி அறிவித்த நிலையில், ஒய்.எஸ்.ஆர். காங்கிரஸ் கட்சி மீண்டும் ஆட்சிக்கு வந்தால், இதனைப் பயன்படுத்த திட்டமிடப்பட்டிருந்தது.

நவ.13-ம் தேதி பள்ளிகளுக்கு விடுமுறை… எந்த மாவட்டத்திற்கு தெரியுமா.?
மேலும் செய்திகள்…