அக்டோபரில் ஜிஎஸ்டி வசூல் அதிகரிப்பு.. எவ்வளவு தெரியுமா?

சமீபத்தில் நிதி அமைச்சகத்தால் வெளியிடப்பட்ட டேட்டாக்களின் அடிப்படையில், சரக்கு மற்றும் சேவை வரி (ஜிஎஸ்டி) வசூல் அக்டோபர் மாதத்தில் ரூ.1.87 லட்சம் கோடியாக அதிகரித்துள்ளது, இது கடந்த ஆண்டின் அதே காலக்கட்டத்துடன் ஒப்பிடுகையில் 8.9% அதிகரிப்பை பதிவு செய்துள்ளது.

கடந்த ஆண்டு அக்டோபர் மாதம் ஜிஎஸ்டி வசூல் ரூ.1.72 லட்சம் கோடியாக இருந்தது. சிஜிஎஸ்டி, எஸ்ஜிஎஸ்டி, ஐஜிஎஸ்டி மற்றும் செஸ் அனைத்தும் ஆண்டுக்கு ஆண்டு அதிகரித்து வருவதாக அதிகாரப்பூர்வ தகவல்கள் வெளியாகியுள்ளன.

அரசு வெளியிட்டுள்ள அதிகாரப்பூர்வ விவரங்களின்படி, அக்டோபர் மாதத்தில் மத்திய ஜிஎஸ்டி வசூல் ரூ.33,821 கோடியாகவும், மாநில ஜிஎஸ்டி ரூ.41,864 கோடியாகவும், ஒருங்கிணைந்த ஜிஎஸ்டி ரூ.99,111 கோடியாகவும், செஸ் வரி வசூல் ரூ.12,550 கோடியாகவும் இருந்துள்ளது. எனவே கடந்த அக்டோபர் மாதம் மொத்த ஜிஎஸ்டி வசூல் 8.9 சதவீதம் அதிகரித்து ரூ.1.87 லட்சம் கோடியாக உயர்ந்துள்ளது. 2024ஆம் ஆண்டில் இதுவரை மொத்த ஜிஎஸ்டி வசூல் 9.4 சதவீதம் அதிகரித்து ரூ.12.74 லட்சம் கோடியாக உள்ளது, அதே சமயம் 2023ஆம் ஆண்டின் இதே காலகட்டத்தில் ரூ.11.64 லட்சம் கோடி வசூலிக்கப்பட்டது.

இந்த ஆண்டு ஏப்ரல் மாதத்தில் மொத்த ஜிஎஸ்டி வசூல் ரூ.2.10 லட்சம் கோடியை எட்டியது. 2023 – 24 நிதியாண்டில் மொத்த ஜிஎஸ்டி வசூல் ரூ.20.18 லட்சம் கோடியாக பதிவு செய்யப்பட்டுள்ளது. இது முந்தைய நிதியாண்டை விட 11.7 சதவீதம் அதிகமாகும். மார்ச் 2024இல் முடிவடைந்த நிதியாண்டின் சராசரி மாத வசூல் ரூ.1.68 லட்சம் கோடியாக இருந்தது, இது முந்தைய ஆண்டின் சராசரியான ரூ.1.5 லட்சம் கோடியை விட அதிகமாகும்.

ஆதார் அட்டையில் புகைப்படத்தை மாற்றவது எப்படி?
மேலும் செய்திகள்…