டி20 ஆல்ரவுண்டர்கள் பிரிவில் ஆஸ்திரேலியாவின் மார்கஸ் ஸ்டாய்னிஸ் முதலிடம்… – News18 தமிழ்

ஐசிசி டி20 கிரிக்கெட் போட்டிகளுக்கான தரவரிசை பட்டியல் வெளியிடப்பட்டுள்ளது. இதில் ஆல்ரவுண்டர்கள் பிரிவில் ஆஸ்திரேலியாவின் மார்கஸ் ஸ்டாய்னிஸ் முதலிடம் பிடித்துள்ளா. பேட்ஸ்மேன்கள் பிரிவில் இந்திய அணியின் சூர்யகுமார் யாதவ் முதலிடத்தில் நீடிக்கிறார்.

முன்னதாக ஆல்ரவுண்டர்கள் தரவரிசையில் ஆப்கானிஸ்தான் அணியின் முகமது நபி இடம் பெற்றிருந்தார். உலகக்கோப்பை டி20 கிரிக்கெட் தொடரில் மார்கஸ் ஸ்டாய்னிஸ் சிறப்பான ஆட்டத்தை வெளிப்படுத்திய நிலையில் அவர் முதலிடத்திற்கு முன்னேறியுள்ளார்.

இந்த தொடரில் அவர் 6 விக்கெட்டுகளை வீழ்த்தியதுடன் 156 ரன்கள் குவித்துள்ளார். ஸ்ட்ரைக் ரேட் 190 ஆக உள்ளது. வங்கதேச அணியின் ஆல்ரவுண்டர் ஷகிப் அல் ஹசன் 3 ஆம் இடத்தில் உள்ளார்.

பவுலர்கள் தரவரிசையில் மேற்கிந்திய தீவுகள் அணியின் வீரர்கள் அதிரடியான பவுலிங்கால் முன்னேற்றம் அடைந்துள்ளனர். பவுலர்கள் பட்டியலில் இங்கிலாந்து அணியின் சுழற்பந்து வீச்சாளர் அடில் ரஷித் முதலிடத்தை பிடித்துள்ளார்.

வெஸ்ட் இண்டீஸ் அணியின் அகேல் ஹொசைன் 6 இடங்கள் முன்னேறி 2 ஆவது இடத்தையும், அல்ஜாரி ஜோசப் 6 இடங்கள் முன்னேறி 11 ஆவது இடத்தையும் பிடித்துள்ளனர்.

பேட்ஸ்மேன்கள் தரவரிசையில் சூர்யகுமார் யாதவ் முதலிடத்தையும், பில் சால்ட், பாபர் ஆசம், முகமது ரிஸ்வான் ஆகியோர் முறை 2,3,4 ஆவது இடத்திலும் உள்ளனர். ஆஸ்திரேலிய தொடக்க ஆட்டக்காரர் டிராவிஸ் ஹெட் 5 இடங்கள் முன்னேறி ஐந்தாவது இடத்திலும், வெஸ்ட் இண்டீஸ் விக்கெட் கீப்பர் நிக்கோலஸ் பூரன் 8 இடங்கள் முன்னேறி 11வது இடத்திலும் உள்ளனர்.

.