Last Updated:
தற்போது வடகிழக்கு பருவமழை தீவிரமடைந்து தொடர்ந்து மழை பெய்து வருவதால், விவசாயிகள் மகிழ்ச்சியடைந்துள்ளனர்.
தமிழகத்தில் வடகிழக்கு பருவமழை தீவிரமடைந்துள்ள நிலையில், விழுப்புரம் மாவட்டம் செஞ்சி மற்றும் அதன் சுற்றுவட்டாரப் பகுதிகளில் கடந்த சில நாட்களாக அவ்வப்போது நல்ல மழை பெய்து வருகிறது. இதனால், அப்பகுதிகளில் உள்ள விவசாயக் கிணறுகள், குளங்கள், ஏரிகள் உள்ளிட்ட நீர்நிலைகளில் நீர்மட்டம் படிப்படியாக உயர்ந்து வருகிறது.
காலநிலை மாற்றம் மற்றும் போதிய மழையின்மை காரணமாக கடந்த சில மாதங்களாக செஞ்சி பகுதியில் வறட்சி நிலவியது. இதனால், விவசாயக் கிணறுகள் உள்ளிட்ட நீர்நிலைகளில் போதிய தண்ணீர் இல்லாமல் விவசாயப் பணிகளை மேற்கொள்ள முடியாமல் விவசாயிகள் சிரமத்திற்கு ஆளாகினர். இந்நிலையில், தற்போது வடகிழக்கு பருவமழை தீவிரமடைந்து தொடர்ந்து மழை பெய்து வருவதால், விவசாயிகள் மகிழ்ச்சியடைந்துள்ளனர். இதையடுத்து, செஞ்சி மற்றும் அதன் சுற்றுவட்டாரப் பகுதிகளில் சம்பா நெல் சாகுபடிப் பணிகள் தீவிரமடைந்துள்ளன. குறிப்பாக, பொன்னி, ஆர்.என்.ஆர்., சௌபாக்கியா உள்ளிட்ட நெல் ரகங்களை நடவு செய்யும் பணிகளில் விவசாயிகள் மும்முரமாக ஈடுபட்டு வருகின்றனர்.
இதற்கிடையே, செஞ்சி அருகே உள்ள ஆலம்பூண்டி பகுதியில் நெல் நடவுப் பணிகள் விறுவிறுப்பாக நடைபெற்று வருகின்றன. அங்கு லட்சுமி என்ற மூதாட்டி, வயலில் நெல் நடவு செய்தபடியே பாடல்களைப் பாடி உற்சாகமாகப் பணியாற்றி வருகிறார். வேலைப்பளுவையும் களைப்பையும் மறந்து அவர் பாடிக்கொண்டே நடவு செய்யும் காட்சி அப்பகுதியினரின் கவனத்தை ஈர்த்துள்ளது.
