“வனவிலங்கு பாதுகாப்பிற்கான உலகளாவிய பங்களிப்பை வலுப்படுத்துதல்” என்ற முதன்மை கருப்பொருளை மையமாகக் கொண்டு நடைபெற்ற இந்த மாநாட்டில், உலகெங்கிலும் உள்ள 30 நாடுகளைச் சேர்ந்த 98 சர்வதேச அமைப்புகளின் தலைவர்கள், கால்நடை மருத்துவர்கள், வனவிலங்கு ஆய்வாளர்கள் மற்றும் பாதுகாப்பு நிபுணர்கள் பங்கேற்றனர். மேலும், இந்தியாவின் 29 மிருகக்காட்சிசாலை அமைப்புகளின் பிரதிநிதிகளும் இதில் திரளாகக் கலந்து கொண்டனர்.
இம்மாநாட்டின் தொடக்க விழாவில் மூன்று முறை கிராமமி விருது வென்ற பிரபல இசையமைப்பாளரும் சுற்றுச்சூழல் ஆர்வலருமான ரிக்கி கேஜ் சிறப்பு இசை நிகழ்ச்சி நடைபெற்றது. அதனைத் தொடர்ந்து, EARAZA அமைப்பின் தலைவர் ஸ்வெட்லானா அகுலோவா, இந்திய அறிவியல் கழகத்தின் பேராசிரியர் ராமன் சுகுமார் மற்றும் மத்திய மிருகக்காட்சிசாலை அதிகாரசபையின் உறுப்புச் செயலாளர் டாக்டர் வி. கிளெமென்ட் பென் ஆகியோர் பாரம்பரிய குத்துவிளக்கேற்றி மாநாட்டை முறைப்படி தொடங்கி வைத்தனர்.
மாநாட்டின் வரவேற்புரையாற்றிய வந்தாரா மையத்தின் தலைமை நிர்வாக அதிகாரி (CEO) விவான் கரணி, மிருகக் காட்சிசாலைகளின் திறம்பட நிர்வாகத்திற்காக உருவாக்கப்பட்ட ‘ANTZ’ என்ற பாதுகாப்பான கிளவுட் மென்பொருள் தளத்தை EARAZA அமைப்பின் அனைத்து உறுப்பு அமைப்புகளுக்கும் ஒரு வருடத்திற்கு இலவசமாகப் பயன்படுத்த அனுமதிப்பதாக அறிவித்தார்.
மேலும், “காட்டின் நட்சத்திரம்” என்று பொருள்படும் வந்தாராவின் நோக்கம், தாங்கள் உருவாக்கியதை உலகோடு பகிர்ந்து கொள்வது மட்டுமல்லாமல், பிற சர்வதேச அமைப்புகளிடம் இருந்து கற்றுக் கொள்வதும் ஒத்துழைப்பதும் தான் என்று அவர் குறிப்பிட்டார்.
நான்கு நாட்கள் நடைபெற்ற இம்மாநாட்டில், அமுர் புலிகள், துருவ கரடிகள், ஆசிய யானைகள் உள்ளிட்ட அரிய வகை வனவிலங்குகளைப் பாதுகாப்பது, மனித-வனவிலங்கு மோதல்களைக் குறைப்பது, விலங்குகளின் மனநலம் மற்றும் பராமரிப்புத் தரங்களை உயர்த்துவது குறித்துப் பல முக்கிய விவாதங்கள் நடத்தப்பட்டன.
மேலும், வந்தாரா வாழ்விடத்தின் விர்ச்சுவல் ரியாலிட்டி (VR) அனுபவம், அதிநவீன AI தொழில்நுட்பத்துடன் கூடிய உயிரினங்களைக் கண்டறியும் ‘வெஸ்பர்’ சாதனம், முட்டைகளின் ஆரோக்கியத்தைக் கண்காணிக்கும் அமைப்புகள் மற்றும் நவீன கால்நடை மருத்துவக் கருவிகள் அடங்கிய சிறப்புப் பொருட்காட்சியும் காட்சிப்படுத்தப்பட்டது.
மாநாட்டின் நிறைவு நாளில், வனவிலங்கு பாதுகாப்புத் துறையில் வாழ்நாள் சாதனை புரிந்த ஆறு முக்கிய வல்லுநர்களுக்கு வந்தாரா அமைப்பின் சார்பில் ‘வாழ்நாள் சாதனை விருதுகள்’ (Vantara Lifetime Achievement Awards) வழங்கி கௌரவிக்கப்பட்டது.
எல்லைகளைத் தாண்டி சர்வதேச அளவில் தரவுகளையும் நிபுணத்துவத்தையும் பகிர்வதன் மூலம் மட்டுமே வனவிலங்கு பாதுகாப்பை முழுமையாகச் சாத்தியப்படுத்த முடியும் என்ற உறுதியான தீர்மானத்துடன் இம்மாநாடு நிறைவுபெற்றது.
