இத்துறையை அடிமட்ட அளவில் வலுப்படுத்தும் நோக்கில், நாடு முழுவதும் உள்ள 15,000 மேல்நிலைப் பள்ளிகள் மற்றும் 500 கல்லூரிகளில் நவீன உள்ளடக்க உருவாக்க ஆய்வகங்களை அமைப்பதற்காக 2026-27 மத்திய பட்ஜெட்டில் ரூ.250 கோடி நிதி ஒதுக்கீடு செய்யப்பட்டுள்ளது. மேலும், மும்பையில் தேசிய அளவிலான சிறப்பு மையமாக ‘இந்திய படைப்பாற்றல் தொழில்நுட்ப நிறுவனம்’ (ஐஐசிடி) தொடங்கப்பட்டு, கூகுள், மெட்டா, அடோப் போன்ற சர்வதேச முன்னணி நிறுவனங்களுடன் இணைந்து திறன் மேம்பாட்டுப் பயிற்சிகள் வழங்கப்பட்டு வருகின்றன.
கடந்த பத்தாண்டுகளில் யுபிஐ, ஆதார், டிஜிலாக்கர், பாஷினி போன்ற வலுவான டிஜிட்டல் பொதுக் கட்டமைப்புகளை வெற்றிகரமாக உருவாக்கியுள்ள இந்தியா, தற்போது மெய்நிகர் அனுபவங்களை நோக்கிய அடுத்தகட்ட தொழில்நுட்பப் பாய்ச்சலுக்குத் தயாராகி வருகிறது. பயனாளர்களின் நேரடி அனுபவத்தை மேம்படுத்தும் விஆர் உள்ளிட்ட தொழில்நுட்பங்கள் கல்வி, மருத்துவம், சுற்றுலா மற்றும் கலாச்சாரம் உள்ளிட்ட துறைகளில் குறிப்பிடத்தக்க மாற்றங்களை ஏற்படுத்தி வருகின்றன. இதன் தொடர்ச்சியாக, 2023-ஆம் ஆண்டில் சுமார் 125.95 கோடி அமெரிக்க டாலராக இருந்த இந்தியாவின் மெய்நிகர் தொழில்நுட்ப சந்தை மதிப்பு, வரும் 2030-ஆம் ஆண்டிற்குள் 781.87 கோடி டாலராக உயர்ந்து, ஆசிய பசிபிக் பிராந்தியத்திலேயே மிக வேகமாக வளரும் சந்தையாக இந்தியா உருவெடுக்கும் என மதிப்பிடப்பட்டுள்ளது.
இதற்கிடையே, புதுதில்லி பாரத் மண்டபத்தில் அறிவியல் மற்றும் தொழிலக ஆராய்ச்சிக் குழுமம் (சிஎஸ்ஐஆர்) சார்பில் நடைபெற்று வரும் வளர்ந்து வரும் அறிவியல், தொழில்நுட்ப கண்டுபிடிப்புகள் (இஎஸ்டிஐசி) தொடர்பான தேசிய மாநாட்டில், இத்தகைய நவீன தொழில்நுட்பங்களின் எதிர்காலம் குறித்து விரிவாக ஆலோசிக்கப்பட்டு வருகிறது.
கல்வித்துறையில் சென்னை ஐஐடி ஆராய்ச்சியாளர்கள் கிராமப்புற பள்ளி மாணவர்களுக்காக முப்பரிமாண கற்றல் தளங்களை உருவாக்கி வரும் வேளையில், சுற்றுலாத் துறையில் கொல்கத்தா இந்திய அருங்காட்சியகம், ஹம்பி, நாலந்தா உள்ளிட்ட வரலாற்றுச் சின்னங்களை பொதுமக்கள் டிஜிட்டல் முறையில் பார்வையிடும் வசதிகள் பயன்பாட்டுக்கு வந்துள்ளன. நகர்ப்புற நிர்வாகம் மற்றும் உள்கட்டமைப்பை மேம்படுத்துவதிலும் தொலைத்தொடர்புத் துறை இத்தொழில்நுட்பங்களை வெற்றிகரமாகப் பயன்படுத்தி வருகிறது.
இந்தியாவின் கேமிங் துறை சந்தை மதிப்பு 2024-ல் 3.8 பில்லியன் டாலரிலிருந்து 2029-ம் நிதியாண்டிற்குள் 9.2 பில்லியன் டாலராக உயரும் எனக் கணிக்கப்பட்டுள்ளதால், இத்துறையைத் தேசிய அளவில் ஒருங்கிணைக்க மத்திய தகவல் மற்றும் ஒலிபரப்பு அமைச்சகம் சிறப்புப் பணிக்குழுவை அமைத்துள்ளது. கர்நாடகா, மகாராஷ்டிரா, தெலங்கானா ஆகிய மாநிலங்களைத் தொடர்ந்து, தமிழக அரசும் கோவை, மதுரை, திருச்சி, சேலம், திருநெல்வேலி ஆகிய நகரங்களை ஒன்றிணைத்து சென்னையில் எல்காட் நிறுவனம் மூலம் சிறப்பு ஏவிஜிசி – எக்ஸ்ஆர் மையத்தை நிறுவி வருகிறது. இத்தகைய தொடர் முன்னெடுப்புகள் அனைத்தும் வரும் 2047-க்குள் வளர்ச்சியடைந்த இந்தியாவை உருவாக்குவதற்கான அறிவியல் மற்றும் தொழில்நுட்ப உந்துசக்தியாக வலுசேர்த்து வருகின்றன.
